Ескі көліктерді утилизациялау бағдарламасы бойынша Ақтөбеге 400 квота бөлінген. Бағдарлама басталған 15 күн ішінде ақтөбеліктер 145 автокөлік тапсырған. Ол үшін темір тұлпар иелері 48 мыңнан 150 мың теңгеге дейінгі мөлшерде өтемақы алады. Кәдеге аспайтын жеңіл көліктер 41 бекеттегі №392-ші "Акцепт" ғимаратында қабылданып жатыр. Көліктің шыққан жылы мен оған иелік ету мерзімі бойынша шектеу қойылмаған. Өңірімізге биыл 400 квота бөлініп отыр. "Өндірушілердің кеңейтілген міндеттемелерінің операторы" ЖШС-не екі апта ішінде 145 автокөлік тапсырылған. Мұнда салмағы 3,5 тоннадан аспайтын немесе 7 орындықты ескі көліктер қабылданады. Автокөлікпен бірге иесінің қолында арнайы құжаттар да болуы шарт. Еліміздің 17 қаласында қабылдау бекеттері ашылған. Жыл соңына дейін 10 мың көлікті қабылдау жоспарланып отыр. Ол үшін бюджеттен қаражат бөлінген. Мамандардың айтуынша, құжатсыз ескі көліктер ауылдық жерлерде көп. Ал, келесі жылдан бастап автобустар мен жүк көліктерін қабылдау басталады.