Бүгін түнде ақтөбеліктер Персеид метеор ағынын тамашалай алады. Жұлдызды жаңбыр құбылысын бақылау үшін арнайы құралдың қажеті жоқ. Тек аспан ашық, бұлтсыз болуы шарт. Облыстық планетарий қызметкерлері қала сыртында тұрғындарды Персеидті бақылауға шақырады.
Жұлдыздар шеруі 9-13 тамыз аралығында өтеді. Дегенмен, 12-13-іне қараған түні метеорлар Жер орбитасын көптеп кесіп өтеді. Персеид метеор ағынын мүмкіндігінше, жасанды жарықтар кедергі келтірмейтін жерде бақылау қажет. Сондай-ақ, ақтөбеліктер 11-тамыз күні тағы бір астрономиялық құбылысты көре алады. Ертең жартылай күн тұтылады. Жартылай күн тұтылу жолағы Арктика, солтүстік Еуропа мен Қазақстанның солтүстік-шығысынан өтіп, Монғолия, Қырғызстан мен Қытайды қамтиды. Ақтөбеде тұтылудың ең үлкен ширегі 4 пайызды ғана құрайды. Бізде тұтылу күндізгі сағат 14.50-де басталып, 15.29-да аяқталады. Қала тұрғындары күннің тұтылуын ертең 14.30-да облыстық планетарий алдында бақылай алады.