Елімізде тұмауға қарсы вакцина егу басталды. Мектеп, балабақша, мемлекеттік мекемелердегі жұмысшыларға екпе салу науқаны 15 қарашаға дейін жалғасады. Қазақстан бойынша бұл дәріні сатып алу үшін отыз миллион теңгеден астам қаражат бөлінді. "Гриппол+" деп аталатын вакцина Ресей елінен арнайы сатып алынған. Мамандардың айтуынша балалар мен ересектер үшін бұл дәрінің қауіпсіздігі толықтай тексерілген. Елімізде бұл вакцинаға қатысты тұрғындар тарапынан шағым түспеген. Соңғы сегіз айда жедел респираторлы вирустық жұқпа жұқтыруға қатысты 5810 жағдай тіркелді. Оның ішінде 2406 науқас 14 жасқа дейінгі бала. Биыл өткен жылмен салыстырғанда аурушаңдық 10 пайызға төмендеген. Аурудың алғашқы белгілері - дене қызуы көтеріліп, тыныс алу жолдары қабынады. Тамаққа тәбеті болмай, ұйқысы бұзылады. Тұмаудан қорғанудың ең тиімді жолы- уақытылы екпе салдыру. Балаларды тұмауға қарсы егу кестеге сай жүргізіледі. Жақында ғана балаларға туберкулезге қарсы егілетін вакцина құрамынан пластикалық заттар анықталған болатын. Сол себепті жаңа туған нәрсетелер мен мектеп оқушылары үшін вакцина уақытша тоқтатылды. Ресейден әкелінген "Гриппол+" деп аталатын дәрінің қауіпсіздігі жүз пайыз тексерілді деп сендіріп отыр мамандар. Облыста тұмауға қарсы вакцинациялау 15 қарашаға дейін жүргізіледі. Тұрғындар осы аралықта өздерінің тіркелген емханаларына барып тұмауға қарсы дәріні ақылы түрде ектіре алады. Ал тіркелмеген тұрғындар үшін жеке меншік емханаларда да екпе салу науқаны жүріп жатыр. Вакцина бағасы екі мың теңге шамасында. Мамандардың айтуынша адам ағзасында С дәрумені азайып кеткенде тұмау жұқтырып алады. Лимон, бал, таңқурай секілді өнімдерді тұтыну арқылы иммунитті арттыруға болады.