Тұрғындардың биылдан бастап, үйінен шықпай-ақ емханаларға онлайн тіркелуге мүмкіндігі бар. Ол үшін Егов порталына қосылып, өтініш қалдыру керек. Жаңадан тіркеуге тұрған емханаларға тұрғындар 2020 жылдың 1-қаңтарынан бастап қарала алады. 2020 жылға дейін Қазақстандағы барлық қызметтерді онлайн форматқа ауыстыруымыз қажет. Елбасының берген тапсырмасы бұл. Осы бағытта 2015-2020 жылдарға арналған «Цифрлы Қазақстан» бағдарламасына мемлекет қазынасынан 120 млрд теңге бөлінді. Электронды форматқа көшу медицина саласына да келіп жетті. Бұрын учаскелік дәрігер өздері бекіткен емханаға қаралуыңызды міндеттейтін. Енді тұғылықты мекен-жайыңызда 4-5 клиника бар болса, қалауыңызға қарай үйіңізге жақын, өзіңізге қолайлы емханаға тіркеле аласыз. Бір отбасының мүшелері бәрі бірге бір емханада тіркелгені дұрыс. Сондай-ақ азаматтар тіркелгісі келетін медициналық мекемені тек қана өзі тұрып жатқан аумақтан таңдағаны жөн. Бұған дейін мұндай шектеу болған жоқ. Яғни, тұрғын өзі қалаған үйінен алыс емханаға тіркеліп келген еді. Бұл дәрігерлер үшін тиімсіз. Себебі, дәрігерлерге мекен-жайы бойынша тіркелмеген тұрғындарды үйлеріне барып бақылап тұру қиынға соғады. Әсіресе жүкті келіншектер мен перзетханадан жаңа шыққан сәбиді қарау кезінде сергелдеңге түседі. Шара барысында айтылған электронды форматқа ауысу мен медицина саласындағы жаңашылдықтар дәрігерлер жүктемесін азайтады. Науқастарға көрсетілетін медициналық қызмет сапасын жақсартады дейді мамандар.