Ақтөбеде медицина саласында тағы шу шықты. №2 қалалық емхананың мейірбикесі ем қабылдауға келген тұрғынның қолындағы ұялы телефонды құжаттарымен ұрып түсірген. Ғаламторда тарап кеткен видеода медицина қызметкері ем қабылдауға келген адамға айқайлап, қолындағы папкасымен ұрмақ болған, ұялы телефонын қағып түсірген. Осы оқиғадан соң емханада қызметтік тексеру жүріп, дәрігер жазаланды. №2 қалалық емхананың бас дәрігері Қайырбек Тоқтаровтың айтуынша, қандай жағдай болмасын науқастың әрекеті дұрыс. Бұл дәрігерлердің этика және диентологиясында жазылған. Мейірбикеден зардап шеккен қала тұрғыны осы емханаға тіркеулі. 19-қаңтарда баласына екпе жасатуға келген. Мейірбикемен сөзге келіп, кейін оны ұялы телефонына түсіріп алмақ болған. Ал медициналық қызметкер эмоцияға беріліп, оған қарсы шыққан. Мейірбикенің еңбек өтілі 19 жыл. Осы уақыт аралығында жұмысына қатысты ешқандай шағым түспеген. Бірде бір ескерту алып көрмеген қызметкер болғандықтан оны бірден жұмыстан шығара алмадық,-дейді емхананың бас дәрігері. Емханада құрылған комиссия отырысы кезінде медбикені жұмыстан шығару туралы да ұсыныс айтылған. Бірақ, заң бойынша бұған дейін ескерту алмаған, тәртіптік жазаға тартылмаған дәрігерді бірден қызметінен босатуға болмайды. №2 қалалық емхана күніне 1000-нан астам науқасқа қызмет көрсетеді. Мұнда таяуда ғана науқастарды қабылдау тәртібі, дәрігердің этикасы мен диентологиясына қатысты жиын өткен.