Елімізде міндетті екпе салу мерзімі қайта қарастырылады. Әсіресе шағын және орта бизнес қызметкерлерін вакцинациялау уақыты қайта қаралмақ. COVID-19-ды таратпау жөніндегі ведомствоаралық комиссиясы баспасөз қызметінің хабарламасына сәйкес, Премьер-министрдің орынбасары Ералы Тоғжанов мемлекет басшысының тапсырмаларын орындау аясында мемлекеттік органдарға коронавирусқа қарсы іс-қимыл шараларын түбегейлі қайта қарау стратегиясын әзірлеуді тапсырған. Әйткенмен міндетті екпені қай уақытқа дейін алып болуы керегі әлі нақтыланбады. Ал күні кеше президент Қасым-Жомарт Тоқаев қазіргі вакциналау жұмысының қарқыны әлі де мардымсыз екенін айтты. Ол нақты қадамдар жасау қажет деді. Мемлекет басшысы вакцинаға қатысты даңғаза әңгімелерге сенудің қажеті жоқ деп есептейді. Кейбір жекелеген салаларда міндетті түрде вакцина салдыру керек болады деп нақтылап жазды. Бұған дейін әділет министрлігі COVID-19-ға қарсы вакцинаны міндеттеудің құқықтық негізін түсіндірген болатын. Ведомствоның ақпаратынша, инфекциялық және паразиттік аурулардың пайда болуы мен таралуының алдын алу үшін денсаулық туралы кодексте профилактикалық екпелер егу шарасы көзделген. Биылғы жылдың 19 шілдесіне дейін шағын және орта бизнес қызметкерлеріне вакциналау жүргізудің нақты мерзімдерін қайта қаралып, белгіленетін болады. "Pfizer"(Пфайзер) компаниясымен келісімге қол қою жөніндегі жұмысты ұйымдастыру және вакцинаны жеткізу туралы келісімшарт жасасу қамтамасыз етіледі. 19 шілдеге дейін жұмысшылары міндетті вакциналауға жататын салалар анықталады. Сонымен қатар "Ashyq" мобильді қосымшасын белсендіру, мониторингтік топтардың жұмысын қайта форматтау бойынша ұсыныстар енгізу, жаңа оқу жылында оқушылар мен студенттерді оқытудың дәстүрлі нысанын қайта бастау кезінде педагогтар мен оқушылардың денсаулығының қауіпсіздігін қамтамасыз етуде жаңашылдықтар енгізілмек.