Облыс бойынша 400 кәсіпорын қайта жаңғыртылмақ. Биыл бесеуі модернизацияланған. Астанада өткен "ЭКСПО-2017" халықаралық мамандандырылған көрмесінде таныстырылған 18 жоба Ақтөбеде жүзеге асырылады. Ол үшін республикалық бюджеттен 43 млрд.теңге қарастырылған. Қазір мамандар жобалық-сметалық құжаттарымен айналысып жатыр. Солардың бірі ауыл шаруашылығы қалдықтарын қайта өңдейтін зауыт. Сондай-ақ, мұнай қалдықтарын өңдейтін кәсіпорын да Ақтөбеде болады. Индустриялдық-инновациялық даму бағдарламасына сай, өңірімізде 5 жаңа жоба іске қосылмақ. Олардың құны 127 млрд.теңге. 1800 жаңа жұмыс орны ашылады деп күтілуде. Атап айтсақ, олар-Шалқар минералды зауыты, Мұғалжар ауданындағы тау-кен өндіру комбинаттары. Бүгінгі жиын барысында Олжас Смағұлов өнеркәсіп, инвестиция, ауылшаруашылығы мен құрылыс салаларына жаратылып жатқан қаржыларға тоқталып өтті. Жыл басынан облысқа 313,1 млрд. теңге инвестиция тартылған. Облыстың дамуының басты бағыттарының бірі-шағын кәсіпкерлік. Бизнеспен айналысатын тұрғындардың саны биыл 10 пайызға өсті. Биыл өңірімізде 37 балабақша мен 32 мектеп бой көтерді. Жылдың соңына дейін тағы 15 жалпы білім беру мектебінің құрылысы аяқталуы тиіс.Еліміздің батыс аймақтары бойынша алғашқы медициналық кластер Ақтөбеде. Жыл басынан бері 400- ден астам жоғары технологиялық оталар жасалған. Биыл Ақтөбеде емделуге өзге өңірлерден 10 мыңға жуық адам келген.