Ақтөбенің сыртқы байланысы мен туристік маршруты бүгін облыстық мәслихаттың тұрақты комиссиясының кеңейтілген отырысында қаралды. Биыл жоспар бойынша Қобыланды батыр мемориалдық кешені жөнделеді. Абат-Байтақ мовзолейі де реттелмек. Себебі, Қобда ауданы ЭКСПО кезінде шетелдіктерге ұсынылған екі туристік маршруттың біріне айналды. "Батырлар мекені" маршрутына Әлия ауылы, Қобыланды батыр кешені мен Абат-Байтақ мавзолейі енген. Екінші туристік маршрут Мәртөк ауданына қарай. Бұл жердің табиғаты ерекше болған соң қонақтардың таза ауада тыныстап, өзен жағасында, орман ішінде демалуына мүмкіндік жасалмақ. Жоспар бойынша ең көп турист Қытайдан келуі мүмкін. Олар Димаштың туған жері мен өскен өлкесін көргісі келеді. Сөз арасында депутат Асқар Садықов ағаш үй макетіндегі қонақ үйде Димаштың анасы Света Айтбаева қонақтарға құрмет көрсетіп, шай құйса, нағыз туристік маршрут болады деп ұсыныс айтты. Жан-жақты әзірлік жүріп жатқан кезде жол бойындағы қызмет көрсету орындары да талапқа сай болуы керек. Олар тексеріледі. Қазір жол бойында 121 демалыс орны бар. Оның 15 пайызы ғана талапқа сай келеді. Депутаттар ауыл шаруашылығы бағытында да туристік маршрут керек деп санайды. Қала балалары қой-ешкіні танымауы мүмкін. Депутаттар бүгін жол салу, арықтар құрылысымен танысты. Жоспар бойынша Космедемьянская, Ливенцов, Папилов және Мәншүк Мәметова көшесінен Әбілқайыр хан даңғылындағы "Капитан бриг" ойын алаңына дейінгі аумақтағы жолдар жөнделіп, суағар салынады. Депутаттар алдында жол құрылысын айтқан қала әкімі Ілияс Испанов ескі қаладағы бірнеше көшенің су құбырлары ауыстырылатынын жеткізді.