Ақтөбенің ауасы өте лас. Жыл өткен сайын облыс орталығының экологиялық жағдайы нашарлап барады. Мамандардың айтуынша, бұған өндірістен шыққан улы газдар себеп. Кеше Ақтөбеде экология мәселесіне қатысты облыс әкімінің орынбасары Қайрат Бекеновтің қатысуымен көшпелі жиын өтті. Алайда, маңызды жиынға біздің телеарна шықырылған жоқ. Қаладағы жағымсыз иістің себебі мен қолға алынған шаралар жайлы бүгін облыстық экология департаментінің басшысы мәлімет берді. Өңіріміздің бас экологы Жақсығали Иманқұловтың айтуынша, мүңкіген иіске аптап ыстық себеп. Экологтардың пайымдауынша күндіз ауа температурасы 30-33 градусқа дейін көтеріліп, түнде 18-20 градусқа дейін түседі. Содан атмосфералық қысым күрт төмендеп, күкіртті сутек шығарылады. Ал ол ауамен бірге қалаға жетеді. Тексерудің алғашқы нәтижелері екі аптадан соң жария етілуі тиіс. Экологиялық норманы бұзып отырғандар әкімшілік жауапкершілікке тартылады. Сасық иіске қатысы бар кәсіпорындар жабылып қалуы да мүмкін. Қалалық әкімдік пен экология департаментіне ауаға күн сайын мониторинг жүргізу тапсырылды. Экологиялық талапты бұзғандарға қатаң шаралар қолданылмақ. Облыста ауаны ластап отырған 300-ден астам кәсіпорын тіркеулі. Олар кәріз жүйесіне өнеркәсіп қалдықтарын құяды. Қалдықтардың көбін елу ірі өндіріс орны шығарады. Олардың қатарында "СНПС-Ақтөбемұнайгаз" АҚ, "Ақтөбе хром қосындылары зауыты", Ақтөбе ферроқорытпа зауыты бар. Бұл зауыттар күн сайын ауаға 3-6 валентті хром қосындылары бар улы газдар мен түтіндер таратып отыр. Кейбірі зиянды қоспаларды шамадан бірнеше есеге көп шығарады. Биыл қаланың үш ауданында кәріз қалдығын төгетін бекет құрылысы басталды. Біреуі Кірпішті ауылында, екеуі Шанхай мен 41-разъезд аумағында.