"Даңқ" ескерткіші алдында Жеңіс күніне арналған салтанатты митинг өтті. Алаңда ҰОС ардагерлері мен тыл еңбеккерлеріне қошемет көрсетілді. Облыста көзі тірі ардагерлердің саны 40-қа да жетпейді. Олардың да жасы 90-нан асты. ҰОС ардагері Алмат Ермағамбетов бүгінгі мерекеге көппен бірге қатысты. Ақсақалды сөзге тартып көрдік. Күннен күнге есте сақтау қабілетімнен айрылып барамын, дейді. Алмат Ермағамбетов соғысқа 1943-ші аттанған. Бүтін Батыс Украина мен Польшаны жүріп өткен. Львов, Краков қалаларын азат етуге қатысқан. Жеңіс тойын Германияда қарсы алған. Одан кейін Литвада 4 жыл соғысып, елге тек 1949-шы оралған. Соғысқа азық-түлік пен киім-кешек, қару-жарақ жөнелтіп отырған тылдағы жауынгерлердің де еңбегі ерен. Соғыс балаларының өздері бүгінде 70-80-дегі қариялар. Мәңгілік алау алдына келген кейбір ақтөбеліктер соғысқа қатысқан ата-әкелерінің портретін ұстап шықты. Бұл жерде жиын таңғы тоғызда басталып кетті. Облыс әкімі Оңдасын Оразалин бастаған билік өкілдері алдымен ақсақалдарға барып, амандық-саулық сұрасты. Соғыстан қайтпаған ақтөбелік жауынгерлерге арналған "Даңқ" ескерткіші 1970-ші жылы алдымен қазіргі Абай даңғылына қойылған. Гранит ескерткіштің биіктігі 19 метр. Мәңгілік алау 1970-ші жылы 24-ші тамызда жағылды. 1984-ші жылы қазіргі орнына көшірілген. 2015-ші жылы Жеңістің 70 жылдығында ескерткіш қайта жарақтандырылды. Алаңға жиналғандар бүгінге жетпеген ҰОС ардагерлерін бір минут үнсіздікпен еске алды. Ескерткішке және әр жауынгер қала тақтасына гүл қойды. Мерекеге келгендер концерт тамашалады. Ескерткіш маңында естелік суреттерге түсті.