Ақтөбе көлік, коммуникация және жаңа технологиялар колледжі Ақтөбеде алғашқылардың бірі болып 2013-2014 оқу жылында дуалды оқыту жүйесіне қосылды. Негізгі серіктесі - "Қазақстан темір жолы" ҰК АҚ. Қазір колледж студенттері Ақтөбе локомотивті-жөндеу бюросы, Ақтөбе тасымал бөлімшесі және Ақтөбе дабыл және байланыс дистанциясы мекемелерінде темір жол саласының үш мамандығын игеріп жүр. Сабақтардың 65 пайызы өндіріс орнында өтеді.
Біздің облыста 41 колледж бар десек, соның тең жартысы дуалды оқыту жүйесі бойынша білім беруге көшкен. Оқу орындары 56 кәсіпорынмен байланыс орнатып, студенттерге өндіріс орындарында, зертханаларда жұмыс жасап, тәжірибе жинақтауға мүмкіндік берілді. Қазір 26 мамандық бойынша барлығы 700 студент оқытылып жатыр. Президенттің өндірісті оқумен байланыстыру тапсырмасы бойынша былтыр елде колледждердің 60 пайызында дуалды оқыту жүйесі енгізілген. 2019-жылға қарай бұл межені 80 пайызға жеткізу көзделіп отыр.