Бүгін облыстық мәслихат сессиясының кезекті екінші отырысы өтті. Халық қалаулылары облыс әкімі Оңдасын Оразалинмен бірге өңірдің бюджетін тағы бір рет пысықтады. Алдағы үш жылда аймаққа жұмсалатын қаржыны реттеді. Облыстық экономика және бюджеттік жоспарлау басқармасының басшысы Гүлқасима Сүйінтаеваның мәлімдеуінше, бюджет ішкі резервтердің ұлғаюы есебінен қайта нақтыланып отыр. 2021-2023 жылдарға арналған облыс бюджетін бүгін депутаттар мен өңір басшысының алдында облыстың бас экономисі жіктеп берді. Облыстың қазынасынан бөлінген қаржы қомақты. Оның 1 миллиард 110 миллион теңгеден аса қаржысы құрылыс басқармасына беріліп отыр. Бұл қаражатқа Мұғалжар, Ырғыз, Қобда аудандарында жаңа мектептер тұрғызылады. Сондай-ақ, Темір ауданының Саркөл орта мектебіне спорт залы, Алға ауданының Есет батыр ауылында дәрігерлік амбулатория салынатын болады. Тұрғын үй- коммуналдық шаруашылық, жолаушылар көлігі және автомобиль жолдары басқармасына биыл 599 млн теңге бөлінеді. Бұл қаржыға жоспарланғандай, қала мен елді мекендерде жол салынады. Айта кетелік, қаражаттың бір бөлігі білім, спорт, денсаулық салаларына, жұмыспен қамтуды үйлестіру және әлеуметтік бағдарламаларды дамытуға жаратылатын болды.Айта кетерлігі, биыл пандемияға байланысты кейбір ауруханаларға желдеткіш аппараттарын алуға қосымша қаржы берілмек. Ойыл мен Ырғыз аудандары ауруханалары күрделі жөндеуден өтеді. Ал мәдениет басқармасына берілген 591 млн теңгеге өңірдегі 7 мәдениет үйінің материалдық-техникалық базасы жасақталады. Тахауи Ахтанов атындағы облыстық драма театрының әртістерінің сахналық костюмдері жаңартылады. Сондай-ақ, сессияда жерүсті су ресурстарын пайдаланғаны үшін төлемақы мөлшерлемелеріне өзгерістер енгізілді.