Бүгін облыстық мәслихаттың кезекті сессиясы өтті. Оған облыстың жаңа басшысы Оңдасын Оразалин қатысты. Бұл жиында мәслихат хатшысы Сәния Қалдығұлова былтырғы атқарылған жұмыстар туралы есеп берді. Облыстық мәслихатта былтыр 9 сессия өткізілген. 124 шешім қабылданып, 31 нормативтік-құқықтық акт мемлекеттік тіркеуден өткен. 98 мәселе қаралған. Депутаттар қайырымдылыққа 385 миллион теңге жұмсаған. Сондай-ақ, кәсіпкерлікті қатар алып жүрген кейбір депутаттардың облысқа жасаған қаржылай қолдауы ескерілмей қалмады. Мәселен, қалада мемлекеттік-кәсіпкерлік әріптестік аясындағы құрылыста олардың үлесі бар. Облыс әкімінің орынбасары Серік Төленбергенов "Нұрлы жер" мемлекеттік тұрғын үй құрылысы бағдарламасы туралы баяндады. Былтырғы жоспар артығымен орындалған. 870 мың шаршы метрдің орнына 908, 6 мың шаршы метр тұрғын үй пайдалануға берілді. Биыл 1 миллион шаршы метр баспана тұрғызылуы керек. Баспана әрине басты мәселе. Бірақ, қаланың кәріз жүйесі де титықтатып тұрғаны рас. Серік Төленбергенов кәріз жүйесі құрылысы басталатын күн жақын деді. Бірақ, жобаны жүзеге асыруға көмектесеміз деген ресейлік компания ол ойынан бас тартты. Сондықтан қаржы облыстық бюджеттен алынады. Жетпегенін республикалық қазынадан сұрауға тура келеді. Депутат Светлана Айтбаева көп балалы аналарды баспанамен қамту мәселесін көтерді. Бүгінгі сессия отырысында 2019-2021-ші жылдарға арналған облыстық бюджет нақтыланды. Дәлірек айтқанда биылға 3 миллиард 947 миллион теңге көлеміндегі шығын нақтыланды. Миллиард, миллиондар негізгі салаларға бөлінген. Тіпті, сахналық киімдер сатып алуға да 57 миллион теңге, полицейлерді планшеттермен қамтуға да қаржы табылып отыр. Облыстың экономика және бюджеттік жоспарлау басқармасының басшысы Гүлқасима Сүйінтаева бұл мәселені келесі сессияда шешіп келуге уәде берді. Бүгінгі депутаттар жиынында 35 мәселе қаралып, тиісті шешімдер қабылданды.