Облыстық денсаулық сақтау басқармасы басшысының бұрынғы орынбасары Алмат Ермағамбетов өз жұмысына қайта тұрғысы келеді. Бүгін №2 қалалық соттта азаматтық іс қаралды. Арызданушы Алмат Ермағамбетов, жауапкер облыстық денсаулық сақтау басқармасы. Баспасөзде қос қызын Назарбаев университеті мен мектебіне орналастыру үшін ақша бергені белгілі болған соң оны Әдеп кеңесі жұмыстан шығаруға ұйығарым берген. Ал бұл ұйғарымды облыстық денсаулық сақтау басқармасы бұлжытпай орындады. Бүгін қос тарап істің ақ-қарасын анықтауға сотқа жүгінді. Облыстық денсаулық сақтау басқармасы басшысының орынбасары Алмат Ермағамбетов бүгін сот отырысына келмеді. Оның қорғаушысы әрі сенімді өкілі Раушан Ізтілеуова бұрынғы мемлекеттік қызметкердің бар талап-тілегін жеткізді. Облыстық денсаулық сақтау басқармасы Ермағамбетовті 6-шы желтоқсан күні жұмыстан шығарып жіберген. Мемлекеттік қызмет істері және сыбайлас жемқорлыққа қарсы іс-қимыл агенттігінің, Әдеп кеңесі "Мемлекеттік қызмет туралы" Заңның "Мемлекеттік қызметшілерге қызметтік әдепті сақтау бойынша қойылатын талаптар" бабын сақтамаған деген шешімге келді. Яғни, Ермағамбетов мемлекеттік қызметке кір келтіретіндей әрекеттер жасауға жол бермеуі тиіс еді. Бұл оның қолынан келмей, қылмыстық істе 7 миллион теңгені даулап отыр. Айта кетейік, Алмат Ермағамбетов қазіргі күні үш іс бойынша сотта жауап береді. Бірнеше адамды алдап, 17 миллион теңгеден астам ақшаны жымқырған Ботагөз Биекенованың ісінде ол жәбірленуші. Азаматтық істе ол талапкер. Қорғаушысы Раушан Ізтілеуова таяуда Биекенова сотқа "Ермағамбетов зорлауға оқталды" деп арыз жазғанын мәлімдеді. Қазір істі полиция емес, Мемлекеттік қызмет істері және сыбайлас жемқорлыққа қарсы іс-қимыл агенттігі тергеп жатыр. Бұрынғы шенеунікке қатысты істердің немен аяқталары әзірге белгісіз. Ал азаматтық іс бойынша ертең сот отырысы жалғасады.