Дауылды желден көпқабатты үйлердің төбесі ашылып кеткен

Жеңіс даңғылы бойында орналасқан көпқабатты тұрғын үйде, дауылдың салдары әлі аяқталмаған. Бірі жаңбыр суынан зардап шексе, бірі ескі электр бағанасының құлауынан қауіптенеді. Тұрғындар жауапты мекемелерден шатырды қалпына келтіріп, қауіпті нысанды ауыстыруды сұрап отыр. Қаламызда бірнеше минутқа созылған дауылдың салдарын тұрғындар әлі де көріп отыр. Қатты жел ағаштарды құлатып, кейбір тұрғын үйлердің шатырына да зақым келтірді. Соның бірі 1957- жылдары салынған Жеңіс даңғылындағы №16 екі қабатты үй. Тұрғындардың айтуынша, бұл үйдің шатыры 2021 жылы жөндеуден өткен. Алайда арада бес жыл өтпей жатып, қатты желге шыдас бермей ұшып кеткен. Қазір жоғарғы қабаттағы пәтерлерге жаңбыр суы кіріп, төбе мен қабырғалар бүліне бастаған. Тұрғындар әр жауын сайын үйімізді су баса ма деп алаңдайды. Тағы бір алаңдатарлық мәселе үйдің жанындағы ескі электр бағанасы. Олардың сөзінше, бағана қисайып тұр және қатты жел қайталанса, құлап кетуі мүмкін. Сондықтан олар жауапты мекемелерден шатырды қалпына келтіріп, қауіпті нысанды тез арада ауыстыруды сұрап отыр. Тұрғындар әкімшілік пен прокуратураға жазбаша хат жолдаған. Алайда әзірге жауап жоқ,- дейді олар. Қалалық әкімшіліктің баспасөз қызметінің мәліметінше, үйдің шатырына және басқа да құрылысына пәтер иелері кооперативі жауапты. Алайда бұл үйлер- тұрғындардың өздерінің қарауында. Ал тұрғын үй коммуналды шаруашылығы мамандары болса, үйдің шатырын жабудағы тапсырысты олар орындамағанын айтады. Шатыр жоғарыда айтып өткендей 2021 жылы демеушілер тарапынан жабылған. Бірақ, тұрғындар шатырдың үсті жаңа болғанымен, ішкі ағаштарының барлығы бұрынғы, ескі ағаштар екенін айтады. Енді тұрғындар бұл үйдің шатырының кепілдік мерзімі өтіп кетсе өздері жасауға мәжбүр.
Количество показов: 7
Дата создания: 24.06.2026 06:52:22