Облыстық төтенше жағдайлар департаментінің мамандары орман және дала өрттерінің алдын алу шараларын бастады. Былтыр дала және орман өрттері 2016 жылмен салыстырғанда екі есеге көп болған. Дала өрті салдарынан аймақта 5 адам мерт болып, тағы бесеуі зардап шекті. Бүгін облыстық төтенше жағдай департаментінде орман және дала өрттерінің алдын алу және жою бойынша қабылданатын шаралар пысықталды. Биылдың өзінде өңірімізде 11 дала және орман өрті тіркелген. 46 гектар жерді өрт шарпыған. Биыл өрт қауіпі маусымына 52 миллион теңге қаржы бөлінген. Былтырғымен салыстырғанда 38,5 пайызға артық. Бұл қаржыға мамандар оқытылып, киім-кешек, құрал-жабдықтар алынады. Облыстық бюджеттен 15 млн. теңгеден астам қосымша қаржы су таситын 6 тіркеме сатып алуға бөлінген. Биыл "Қазақстан Ғарыш Сапары" АҚ-мен келісімге қол қойылған. Евгений Овчарскийдің сөзінше, ғарыштық мониторинг арқылы былтыр дала өрттерінің 90 пайызға жуығы уақытында анықталды. Мамандандырылған оқыту орталықтарында алда 300 ерікті өрт сөндіруші дайындықтан өтеді. Былтыр құрылған 6 өрт сөндіру бекеті техникалармен толық жабдықталған. Биыл тағы 5 өрт сөндіру бекеті құрылады.