Дүкенді жалға аламын деген кәсіпкердің басы дауға қалды. Ол мемлекеттік мүлік және жекешелендіру департаментінің үстінен облыстық кәсіпкерлер палатасына арызданды. Жеке кәсіпкердің шағымы бүгін облыстық кәсіпкерлер палатасының кәсіпкерлер құқығын қорғау және сыбайлас жемқорлыққа қарсы іс-қимыл жөніндегі кеңесі отырысында қаралды. Отырыс Zoom режимінде өтті. Кеңеске заңгерлер, депутаттар, кәсіпкерлер қатысты. Жеке кәсіпкер Жанар Галиеваның бизнес саласында тәжірибесі мол. Ол Қазақстан Республикасы Ішкі істер министрлігіне қарасты қылмыстық-атқару жүйесі комитетінің "КА-169/2" мекемесінің аумағындағы объектіні жалға алып, дүкен ашуды жоспарлайды. Заң жүзінде барлық талаптарды орындап, жалға алу шартына және қабылдау-тапсыру актісіне қол қояды. Облыстық кәсіпкерлер палатасының мамандары жалға берушілер шарт талаптарын бұзды деп есептейді. Олар жалдау құнын есептеуде заңсыздықтарға жол берген. Ал жеке кәсіпкер Жанар Галиева жалға алып отырған нысан кез-келген адам кіріп-шыға алмайтын жерде орналасқан. Осыған байланысты қосымша құжат дайындау керек болған. Бірақ ішкі келіссөз уақытылы дайын болмаған.Кәсіпкер мемлекеттік мүлік және жекешелендіру департаменті алым-берім актісін қайта-қайта түзеп, уақыттың созылып кеткенін жеткізді. Айта кетейік, биыл өңірлік кәсіпкерлер палатасына бизнесті қорғау желісі бойынша 62 өтініш түсіп, оның 51-і оң шешімін тапты. Ал қорғалған мүліктік құқықтардың сомасы 1 миллиард теңгеден асты.