Мемлекеттік сатып алуларды тиімді өткізу кезінде бюджеттің 1 жарым миллиард теңгесі үнемделді. Енді бұл қаржы құрылыс жұмыстарын аяқтау, әлеуметтік нысандарға жобалық-сметалық құжат дайындау, тұрақтандыру қорына азық-түлік сатып алу үшін бөлінді. Мәселен, 73 миллион теңгеге қала ішінен 5 мектеп пен 5 балабақша салу үшін жобалық-сметалық құжат дайындалады. Ал 59 миллион теңгеге Батыс-2 ауданында басталған балабақша, Мұғалжар ауданының Шеңгелші ауылындағы емхананың құрылысы мен облыс әкімдігінің гаражы салынады. Бюджетке өзгертулер мен толықтырулар енгізу кезінде ауыл шаруашылығы саласына 225 миллион теңгеден астам қаржы бөлінді. Оның 175 миллион теңгесі Тұрақтандыру қорына азық-түлік, соның ішінде, жоғары сортты ұн, қант, күріш, сұйық май сатып алуға бөлінді. Үнемделген қаржыны бөлу кезінде облыстық ІІД-не де мол қаржы берілді. Облыстық мәслихаттың кезектен тыс сессиясы кезінде физика-математика мектеп-интернатының  да тағдыры шешілді. Бұған дейін қала шетіндегі Кеңес Нокин ауылына қоныстанып, кейін қала ішіндегі балабақша ғимаратына көшірілген мектеп үшін  енді мемлекеттік-жеке меншік серіктестік негізінде жаңа ғимарат жалға алынады. Сонымен қатар, экономика және бюджетті жоспарлау басқармасы "Дипломмен ауылға" баратын 49 маманға 155 миллион теңгеден астам қаржы бөлді. Республикалық айтыс пен қазақ тілін үйрету жұмыстары үшін облыстық тілдерді дамыту басқармасына 28,9 миллион теңге берілді. Қаржы тәуелсіздіктің 25 жылдығына  орай ұйымдастырылатын мерекелік шараларға да бөлінді.