Бухгалтерлік есептің дұрыс жүргізілмеуінен бюджет қаржысы талан-таражға түскен
2025 жылдың алғашқы жартыжылдығында Ақтөбе облысы бойынша Ішкі мемлекеттік аудит департаменті 76 аудиторлық іс-шара жүргізіп, жалпы сомасы 34 миллиард теңгеден астам бұзушылықты анықтады. Оның ішінде 1,8 миллиард теңге - қаржылық, ал 32 миллиард теңгеден астамы - рәсімдік сипатта. Қаржылық есептілік аудиті де біраз былықтың бетін ашты. 66 миллиард теңгеден астам сомаға бұзушылық тіркелген. Дені - бухгалтерлік есеп жүргізудегі кемшіліктер.Жалпы, анықталған заң бұзушылықтардың 98 пайызы қалпына келтірілді. Оның ішінде 88 миллион теңгеден астамы бюджетке қайтарылса, 735 миллион теңге қызмет көрсету арқылы өтелген. Ал 56 миллиард теңге бухгалтерлік есепке түзету енгізу арқылы қалпына келтірілді. Камералдық бақылау да ауқымды көлемде жүргізілді. 349 миллиард теңгеден астам қаражатты қамтыған бақылау барысында, 11,6 миллиард теңгеге жуық бұзушылық анықталды.
Жалпы, жыл басынан бері департаментке 648 өтініш келіп түскен. Оның 600-ден астамы қаралып, тиісті шешімдер қабылданған. Аудит нәтижесінде 150 әкімшілік құқық бұзушылық туралы хаттама толтырылып, 12 миллион теңгеден астам айыппұл бюджетке өндірілді. Сонымен қатар 99 лауазымды тұлға тәртіптік жауапкершілікке тартылды. Олардың қатарында мектеп пен аурухана басшылары, бухгалтерлер мен бөлім жетекшілері бар.Тәртіптік жауапқа тартылғандардың қатарында білім беру және денсаулық сақтау ұйымдарының басшылары, олардың орынбасарлары, бөлім басшылары мен бас бухгалтерлер бар. Олардың дені қазынадан бөлінген қаражатты негізсіз түрде жаратқан. Ішкі мемлекеттік аудит департаменті алдағы уақытта да бюджет қаржысының тиімді әрі заңды жұмсалуын қатаң бақылауда ұстайтынын мәлімдеді.
Количество показов: 45
Дата создания: 18.07.2025 07:47:09
