Былтыр облыста 17 мектепті қайта ұйымдастыру жұмысы жүргізілуі тиіс болатын. 13 мектепте бұл тапсырма орындалмады. Байғанинде 3 мектеп, Қарғалыда 5, Мұғалжарда 1 және Хромтауда 4 мектеп. Осы жылы 5 мектеп-интернат пайдалануға беріледі. Олар Хромтау, Алға, Мәртөк, Ырғыз бен Байғанин аудандарында салынды. 2019-шы жылы тағы төртеуі іске қосылады. Темірде екі мектеп-интернат салынады. Қарғалы мен Мұғалжар аудандарында бір-бірден. 2020-шы жылға дейін бұл жұмыстар оңтайландыру жоспарын орындауға септік етуі тиіс деді, бүгін алқа жиынында білім басқармасының басшысы Ләззат Оразбаева. Былтыр аймақта жоспар бойынша 63 мектепке дейінгі ұйым пайдалануға берілуі тиіс болатын. Ол бақшалар 5450 бүлдіршінді қамтуы тиіс болған. Алайда 3514 орынға есептелген 39 балабақша ғана ашылды. 2017-шы жылға бақша ашу жоспарын Мәртөк, Байғанин мен Қобда аудандары толық орындаған. Өзге аудандарда жоспардың орындалмауына инвесторлардың жоқтығы, қаражат тапшылығы себеп. Ал биыл облыста 5660 баланы тәрбиелейтін 38 мектепке дейінгі ұйым ашылуы керек. Құрылыс мемлекеттік-кәсіпкерлік әріптестік аясында жүзеге асады. Былтырғы оқу жылында 406 мұғалім қажет болса, қазір 290 педагог керек. Оның ішінде бастауыш класс мұғалімдері тапшы. Ал ҰБТ нәтижесі бойынша өткен жылы Ақтөбе ел бойынша үздік төрттікке енген. Орташа балл 82,4 балл. Республикада көрсеткіш 1,9 балға жоғары. Биыл әзірге ҰБТ науқанына ешқандай өзгеріс енгізілген жоқ.