«Бойымыз жылынбайды»

Шаһардағы бірнеше бау бақша ұжымының тұрғындары қыста қатып отыр. Үйіміз салқын, күндіз-түні бойымыз жылымайды дейді олар. Оған себеп - көгілдір отын қысымының аздығы. Бау-бақша ұжымдарын газбен қамтитін құбыр иесі өтінішімізге құлақ аспайды деп налиды. Айтуларынша, бармаған жер, баспаған таулары қалмапты. "Абрикос" бау-бақша ұжымының тұрғыны Ғайни Ізбағамбетова екі жылдан бері қыс түссе өлместің күнін кешеміз дейді. Оған себеп - тұрғын үйге берілетін көгілдір отын қысымының аздығы. Шәйнек сағаттап қайнап, пеш қанжылым күйде тұрады дейді. Көгілдір отынның жырын екі жылдан бері жырлап келе жатқандардың қатарында тағы 20-ға жуық бау-бақша ұжымының тұрғындары бар. Геофизик, Шиелі бағы, Черемуха, Актюбсельмаш, Дорожник секілді бау-бақша ұжымдарында да басты мәселе осы. Үйлеріндегі балалар мен қариялар кезек ауырып жатыр. Жылымақ түгілі, шәй қайнатып ішу мұң дейді олар. Ал, Ғайни апайдың айтып отырған Іңкәрі - көгілдір отын жүргізілген құбыр желісінің иесі. Мәселеден хабардар дейді тұрғындар. Іңкәр Мықтығұлова екі жыл бұрын жеке құбырларды сатып алған. Сол уақыттан бастап қыста тоңып жүрміз деп налиды халық. Ал, газ құбыры желісінің иесі өз уәжін айтты. Жоғары да аталған бау-бақша ұжымдарының кейбірі оның иелігіне жатпайды. Айтуынша, тұрғындар жылына бір рет төлейтін техникалық қызмет үшін ақыларын төлемей отыр. Ал, газ қысымын жуырда көтерген. Оған қоса, халыққа қастық қылатын да адамдар бар дейді Іңкәр Мықтығұлова. Мысалы, кеше белгісіз біреу газ құбырының бұрағышын жауып кеткен. Осылайша, 40 үй жылусыз қалыпты. Дегенмен, бау-бақша ұжымының тұрғындары құбырдың газ қызметінің иелігіне өткенін қалайды. Қала әкімінің баспасөз хатшысының сөзінше, халық сотқа шағымдана алады. Жауапты мекемеге тапсыруы үшін алдымен желі иесіз болуы керек немесе иесі өз еркімен тапсыруы қажет. Иесіз деп тану үшін сотқа жүгіну шарт. Егер бір жыл ішінде иесі табылмаса, сот газ желілерін иесіз деп танып, оларды мемлекет меншігіне беру туралы шешім шығарады.
Количество показов: 10
Дата создания: 18.12.2025 09:42:37