Шаһарымызда ҚР спорт шебері Андрей Еськинді еске алуға арналған бокстан жастар арасындағы VIII - облыстық ашық турнир басталды. Облыстық олимпиада ізбасарларын даярлау орталығында өтіп жатқан спорттық шарада Қазақстан, Ресей мен Өзбекстан спортшылары бақ сынайды. Спорттық сайыстың ашылу салтанатына олимпиада чемпионы Ермахан Ыбрайымов, бокстан танымал жаттықтырушы Әділ Басығараев пен Азия және Әлем чемпионы Галиб Джафаров қатысты. Жыл сайын өткізілетін спорттық шараға қатысуға биыл Ресей мен Өзбекстан елдері ниет білдірген. Ақмола облысының боксшылары да алғаш қатысып отыр. Одан өзге жергілікті спортшылар, Қызылорда, Батыс Қазақстан, Оңтүстік Қазақстан, Атырау, Маңғыстау өңірлерінен жастар келді. Үш елдің 80-ге жуық спортшысы 79 жекпе-жек өткізеді. 4 күнге созылатын спорттық жарыста 10 төреші төрелік етеді. Бірі Ресейден, қалғаны жергілікті төрешілер.