Бүгін "Астана" ауданының әкімі Мамырғали Аққағазов Жаңақоныс ауданының тұрғындарымен кездесті. Аудан әкімі биыл тұрғын алабында атқарылатын жұмыс жоспарымен таныстырды. Сондай-ақ, өзекті мәселелерге тоқталып, тұрғындар сауалына жауап берді. Биыл "Жаңақоныс-5" тұрғын алабына электр желілерін жүргізу жұмыстары басталады. Сондай-ақ, Жаңақоныс-3,4,5 тұрғын алаптарына жыл соңына дейін көгілдір отын жеткізіледі. Бұл туралы бүгін "Астана" ауданының әкімі Мамырғали Аққағазов Жаңақоныс және Жаңақоныс-2,3,4,5 тұрғын алаптарының халқымен кездесу барысында айтты. Кездесуге келген тұрғындар жол мәселесін қозғады. Аудан әкімі 2021 жылы жөндеуден өткен Совет, Алматы көшелеріне биыл асфальт жабындысының екінші қабаты төселетінін жеткізді. Сондай-ақ, Едіге батыр көшесінен "Алты үй" тұрғын алабы арқылы Жаңақоныстың Абай көшесіне жол салынбақ.Атап өту керек, "Халық қатысатын бюджет" жобасы аясында биыл қаланың "Астана" ауданында 80 жоба жүзеге асырылмақ. Оның ішінде осы Жаңақоныс және Жаңақоныс-2,3,4,5 тұрғын алаптарына балалар, спорт алаңдарын салу жобалары бар. Бүгінгі кездесуге келген тұрғындар қоғамдық көлік мәселесін қозғады. Айтуларынша, қаланың орталығына қатынайтын №45-бағыттағы автобус қазір тұрғын алабының ішіне кірмей, сыртынан қайтады. Тасжолдан алыс тұратын тұрғындар үшін аялдамаға жету қиынға соғады. Бұл сауалға жауап берген қала әкімінің орынбасары Дамир Көбенов автобустар тұрғын алабының ішіне кіру үшін алдымен жолдарға асфальт төселуі керектігін айтты.
Жаңақонысқа қатынайтын тағы бір автобус - №37-бағыт. Тұрғындар бұл бағытта жүретін автобустар саны аз деп шағымданды. Жаңақоныс тұрғындарын әуреге салып жүрген мәселелердің бірі - тұрғын алабында "Қазпошта" АҚ бөлімшесі жоқ. Ең жақын бөлімше "Оңтүстік-батыс" ауданында. Поштаның болмауы, әсіресе, зейнеткерлерге қиындық туғызуда. Алайда, "Қазпошта" АҚ өкілі жуық арада мұнда бөлімше ашылмайтынын жеткізді. Атап өтейік, "Жаңақоныс" тұрғын алабында 70 орындық мәдениет үйін салу үшін бюджеттен 170 млн теңгеге жуық қаржы бөлінді. Жауапты мердігер мекеме бекітіліп, жұмыстар биылғы жылы басталатын болады.