Бүгін облыстық мәслихаттағы "Нұр Отан" партиясы депутаттық фракциясының кезекті отырысы өтті. Отырысқа өңір басшысы Оңдасын Оразалин қатысып, облыстың территорияларды дамыту бағдарламасының орындалуы туралы айтып берді. 2016 жылдан бастап өңір экономикасы 30 пайызға артқан. Яғни, 2,7 трлн. теңгеге өсті. Мұнай және газ саласына тәуелділік төмендеген. Бұл туралы бүгін аймақ басшысы Оңдасын Оразалин облыстық мәслихаттағы "Нұр Отан" партиясы депутаттық фракциясының кезекті отырысында айтты. Керісінше, өңдеуші өнеркәсіптің үлесі артқан. 137 пайызды көрсетіп отыр. 2016 жылдан бастап аймаққа 1 трлн. теңге инвестиция тартылды. Биыл қосымша 600 млрд. теңге инвестиция тарту көзделген. 2016-2018 жылдары аймақта 72 мың жаңа жұмыс орыны ашылды. Ауыл шаруашылығы өнімдерінің де үлесі жоғары. 2015 жылмен салыстырғанда 120 пайызға артыпты. Былтырғы жылдың соңында облыста көкөніспен қамтамасыз ету деңгейі 93 пайызға жуықтаған. Облыс әкімі Оңдасын Оразалиннің сөзінше, өңірде инфрақұрылым белсенді дамып келеді. 2016 жылдан бастап 3 млн. шаршы метрге жуық тұрғын үй салынды. Биыл тағы 1 млн. шаршы метр үй салу жоспарда бар. Жол саласы бойынша атқарылған істер де бүгін депутаттардың алдында айтылды. 2016-2018 жылдары аймақта 800 шақырымнан астам жол салынып, жөнделді. Жыл соңына дейін 500 шақырым жол жөнделіп болуы тиіс. Биыл 3 аудан мен облыс орталығындағы 4 жоба іске асса, өңір тұрғындарының 95 пайызы ауыз сумен қамтылады. Ол үшін 3,6 млрд. теңге бөлінген. 90 пайызға жуық ақтөбелік көгілдір отынмен қамтылады деп жоспарланып отыр. Жуырда республикалық бюджеттен 2,5 млрд. теңге бөлінген. Қазір газ құбырын тарту жұмыстары Әйтеке би, Ырғыз, Қобда, Алға аудандарында жүргізіліп жатыр. Оған қоса, облыста 11 мектептің құрылысы жүріп жатыр деді аймақ басшысы. Жыл соңына дейін тағы 5 білім мекемесі пайдалануға беріледі. Гүлқасима Сүентаева 2020-2022 жылдарға арналған облыстық бюджеттің жобасы туралы айтып берді. Білім саласына алда 41,2 млрд. теңге облыстық бюджеттен қарастырылған. Оның 13 млрд. теңгеге жуығы мұғалім, педагогтардың еңбекақысын арттыруға жұмсалады. 1,5 млрд. теңгеден астам қаржы 8 арнаулы түзету мекемесіне бөлінеді. Тағы 1,6 млрд. теңге 15 мектепті жөндеуге бөлінуі мүмкін. Денсаулық саласына да аз қаржы бөлінбейді. Облыстық бюджеттен 5,8 млрд. теңге, республикалық бюджеттен 4,9 млрд. теңге қарастырылып отыр. Дәрі-дәрмек, екпелер сатып алуға, перинаталдық орталық пен медициналық бөлімшелер салуға да жұмсалады.