Облыс әкімі Бердібек Сапарбаевтың өңірдегі мәдениет саласына бейжай қарамайтындығы белгілі. Бүгін облыстық мәдениет, мұрағаттар және құжаттама басқармасының басшысы Қанат Айтбаев БАҚ өкілдері алдында есеп берді. Өткен жылды қортындылап, биылғы жоспарларды атап өтті.
Облыстағы мәдениет мекемелерінде барлығы 3081 қызметкер жұмыс істейді. Оның ішінде 1488-і шығармашылық саласында. Өткен жылы бюджеттен мәдениет саласына 3 жарым милилиард теңге бөлінсе, биыл 4 миллиард 315 миллион теңге қарастырылған. 1-ші тоқсанның қортындысы бойынша 1 миллиард 188 млн теңгесі игерілді. Оның 130 млн теңгесі "Жұмыспен қамту - 2020" жол картасы бағдарламасы аясында Байғанин, Қобда, Мәртөк, Темір және Ойыл аудандарындағы мәдениет үйлері мен клубтарын күрделі жөндеуден өткізуге жұмсалды. 277 млн теңгесі қаламыздағы облыстық тарихи-өлкетану музейінің ескі ғимараты жанынан қосымша әкімшілік құрылысына бағытталды. Ал музейдің жаңа ғимаратын тұрғызуға қажетті 645 миллион теңгенің әзірге 198 миллион теңгесі бөлінді. Жоба мемлекеттік-жекеменшік әріптестік аясында жүзеге асырылмақ. Сонымен қатар биыл қаламызда 1500 орындық концерттік зал салу қолға алынуда. Ұлттық "Мәдени мұра" жобасы аясында жұмыстар 4 бағытта жүргізілуде. Өңірімізде 659 тарихи, археология, сәулет ескерткіштері мемлекеттік тізімге енгізілді. Оның ішінде 9-ы мемлекет қорғауында. Т.Ахтанов атындағы облыстық драма және "Алақай" қуыршақтар театрлары, Ғ.Жұбанова атындағы облыстық филармония әртістері көрші облыстарға гастрольдік сапарларға шығып, өзара тәжірибе алмасып жүр. Мәдениет саласы қызметкерлерінің жалақысы 35 пайызға, оның ішінде таза шығармашылықпен айналысушы қызметкерлер табысы 40 пайызға өсті.
Облыста барлығы 239 мемлекеттік кітапхана қызмет жасайды, 6 ауылдық кітапхана модельдендіріліп, 103 кітапхана интернет жүйесіне қосылды. Орта есеппен өткен жыл ішінде 23 мыңнан астам түрлі шаралар ұйымдастырылған. ҚР Тәуелсіздігінің 25 жылдығы және белгілі композитор, дирижер, халық әртісі, жерлесіміз Ахмет Жұбановтың 110 жылдық мерейтойына орай түрлі байқаулар ұйымдастырылып келеді.