Биыл көктемгі дала жұмыстары 790 мың гектар аумақта жүргізіледі
Биыл өңірде көктемгі дала жұмыстары 790 мың гектар аумақта жүргізілетін болады. Бұл былтырғы көрсеткішпен салыстырғанда 35 мың гектарға артық. Егіс алқаптарын әртараптандыру мәселесі облыс әкімі Асхат Шахаровтың төрағалығымен өткен жиында қаралды. Жалпы алғанда, майлы дақылдар алқабын 75 мың гектарға, мал азықтық дақылдарды 277 мың гектарға, картопты 3,5 мың гектарға дейін ұлғайту көзделген. Асқар Жүсібалиев қала және аудан басшыларына картоп пен көкөніс егістіктерін ұйымдасқан шаруашылықтар есебінен арттыру қажет дейді. Себебі бұл дақылдардың шамамен 70%-ы жеке қосалқы шаруашылықтарда өндіріліп, базарлар мен дүкендерге түспейді. Аймақта көктемгі егіс үшін 49 мың тонна тұқым қажет. Оның 41 мың тоннасы қазір дайын. Қалған жетіспейтін тұқым көлемін толықтыру жұмыстары жүргізіліп жатыр дейді басқарма басшысы. Өңір басшысы Асхат Шахаров жауапты мамандарға егіс алқабын кеңейту мәселесін басты назарда ұстауды тапсырды. Оның ішінде мал азығы да бар. Жетіспейтін тұқым көлемін жабу үшін аймақ басшысы қаржыландырып, техникамен қамтамасыз етуге дайын екендерін жеткізді. Биыл 60 мың тонна минералдық тыңайтқыш енгізу жоспарланған. Тыңайтқыштардың құны 50%-ға дейін, ал отандық тыңайтқыштар үшін 60%-ға дейін субсидияланады. Асқар Жүсібалиев агротехникалық талаптарды сақтамайтын, топырақ құнарлылығын арттыру жұмыстарын жүргізбейтін және өнімділікті көтеру шараларын қабылдамайтын фермерлерге қойылатын талаптар қатаңдайтынын ескертті. Бұл талаптарды орындамаған шаруашылықтар мемлекеттік қолдаудан айырылады.Количество показов: 7
Дата создания: 30.01.2026 07:17:43
