Бүгін "Aqtobe su-energy group" АҚ ғимаратында облыстық мәслихаттың "Бюджет, өңірлік және салалық даму жөніндегі" тұрақты комиссиясының көшпелі отырысы өтті. Жиынға облыстық мәслихат депутаттары, облыстық қоғамдық кеңес мүшелері, басқарма басшылары және коммуналдық кәсіпорындардың өкілдері қатысты. Күн тәртібінде облыстың елді мекендерін ауыз сумен, газбен және жарықпен қамтамасыз ету бойынша қабылданып жатқан шаралар қаралды. Облыс халқының 93%-ы газбен қамтамасыз етілген. Бұл туралы бүгінгі жиында облыстық энергетика және тұрғын үй-коммуналдық шаруашылығы басқармасының басшысы Ержан Мұздыбаев мәлімдеді. Оның ішінде соңғы үш жылда 46 ауылға көгілдір отын жеткізілген. Өткен жылы 33 жобаны жүзеге асыру үшін 5,8 млрд теңге бөлінген. 16 жоба толығымен аяқталып, 17-сі биылға қалған. Ал ағымдағы жылы аймақтарды көгілдір отынмен қамтамасыз ету бойынша 3,7 млрд теңгеге 17 жобаны іске асыру көзделген. Жалпы 2022-2025 жылдарға арналған кешенді жоспар аясында облыста 227 елді мекен газбен қамтылады. Қалған 96 елді мекенге газ желісін апару халық санының аз қоныстануына байланысты экономикалық жағынан тиімсіз саналады. Басқарма басшысы сондай-ақ, өңірді сапалы ауыз сумен қамтамасыз ету мәселесіне ерекше тоқталды. Бүгінгі күні облыс бойынша 231 елді мекен ауыз сумен қамтамасыз етілген. 92 ауыл орталықтандырылмаған сумен жабдықтауды пайдаланады. Елді мекендерді сапалы ауыз сумен қамтамасыз ету шаралары биыл да жалғасын табады. Бұл мақсатқа ағымдағы жылы 2,9 млрд теңге қаражат қарастырылған. Барлығы 22 жоба жүзеге асырылмақ. Жиын барысында баяндамашылар депутаттардың, қоғамдық кеңес мүшелерінің сауалдарына жауап берді. Аталған мәселелердің арасында бау-бақша ұжымдарын газбен қамту өзекті болды. Ержан Мұздыбаев бау-бақша ұжымдарына көгілдір отынды жеке кәсіпкерлер жеткізіп отырғанын, оған мемлекет тарапынан ықпал жасалмайтынын айтты. "Aqtobe su-energy group" АҚ-ның балансындағы тозығы жеткен құбырлар мәселесі де көтерілді. Бұл тұрғыда басқарма басшысы тиісті жұмыстар атқарылып жатқанын жеткізді. Бүгінгі депутаттар жиынында бірқатар коммуналдық кәсіпорын басшылары да баяндама жасады. "Aqtobe su-energy group" АҚ, "ҚазТрансГаз Аймақ" АҚ облыстық өндірістік филиалы және "Энергожүйе" ЖШС төрағалары биылға жұмыс жоспарларымен бөлісті. Жиын барысында, сондай-ақ, халық қалаулылары су тазарту құрылыстарының жұмысымен танысты.