Биыл 18 әйел сүт безі обырынан көз жұмды
Аймақта қазір сүт безі обырына шалдыққан 2179 қыз-келіншек бар. Биыл 9 ай ішінде 161 адам есепке алынған. 18 әйел дертіне дауа таппай, көз жұмған. Дәрігерлер дабыл қақты. Бүгін - Дүниежүзілік сүт безі обыры күні. Әлем бұл күнді жыл сайын атап өтеді. Мақсат - кеуде обыры туралы қоғамды хабардар ету, ерте диагностика мен алдын алу шараларының маңыздылығын түсіндіру. Дәрігерлердің айтуынша, бұл дерт онкологиялық аурулар арасында бірінші орында тұр. Бұрын 40 жастан асқан әйелдерде жиі анықталатын, қазір сүт безі обыры жасарып келеді. Ақ халаттылар әйелдерге өз денсаулығына назар аударып, уақтылы тексеруден өтуге шақырады. Қазір сүт безі обырының 1-сатысымен 560-тан астам адам есепте тұр. Олар 87-сі 20 мен 40 жас аралығында қыз-келіншек. 40-50 жас аралығында 274 әйел де осы қатарда. Ал, 50 жастан асқандардың 1818-і обырдың 1-сатысына шалдыққан. Қазір өңірде 40 пен 70 жас аралығындағы әйелдер үшін маммографиялық скрининг белсенді жүргізіліп жатыр. Олжас Оразаевтың сөзінше, жеделдетілген диагностика үшін маршруттау жүйесі және жасыл дәліз де қарастырылған. Барлық аудандарда онкологиялық кеңес және маммография бар. Ауру ерте анықталса, емделу мүмкіндігі де жоғары дейді дәрігер. Ал, қала тұрғындары "ауырып ем іздегенше, ауырмаудың жолын іздеу керек" деген пікірде. Медициналық скрининг адамның жас ерекшелігі мен жынысына қарай жүргізіледі. Елде ДСМ бекіткен ұлттық скринигтік бағдарлама бар. Скрининг тіркелген емханада тегін жүргізіледі. Ал, ДДҰ мәліметінше, 2022 жылы әлемде шамамаен 2 млн-нан астам әйелге сүт безі обыры диагнозы қойылған. Олардың 670 мыңы ауыр дерттен көз жұмды. Ал, 2050 жылға қарай әлемде сүт безі обырынан қайтыс болатындар саны 68 пайызға артады. Әсіресе, дамушы елдерде, дейді ұйым. Сондықтан қоғамға дерттің қауіптілігі мен алдын алу жолдарын түсіндіру де маңыды рөл атқарады. Сөз соңында, Олжас Оразаев "өзіңізге қамқорлық жасауды кейінге қалдырмаңыз. Жылдың бір күнін скринигке жұмсасаңыз, бұл ондаған жылдар бойы сізге өмір сыйлайды" деп нәзік жандыларға үндеу жолдады. Ал, 18-қазанда таңғы сағат 9-дан күндізгі 13.00-ге дейін медициналық орталықта ашық есік күні өтеді.Количество показов: 14
Дата создания: 16.10.2025 07:53:40
