Өңірде 10 500 гектарға жуық орман және дала алқабы өртенген. Былтырғы көрсеткішпен салыстырғанда 9,5 есеге аз. Бұл туралы бүгін облыстық төтенше жағдайлар департаментінде өткен семинар-кеңесте айтылды. Мамандар қауіпті маусымды қорытындылады. Облыста жыл сайын дала және орманда 200-300 рет өрт тіркеледі. Бірақ, былтырмен салыстырғанда биыл 30 пайызға төмендеген. Республикалық және облыстық маңызы бар жолдардың бойында өрттің алдын алу шаралары жүргізілген. Бұл салада 2017-2020 жылдарға арналған арнайы жоспар бар. Мамандардың сөзінше, қазір аудандардағы өрт сөндіру құрылымдарының жұмысы жанданған. Тілсіз жауға қарсы күресте бірнеше атқарушы орган үздік деп танылды. Олардың арасында қалалық, Ырғыз, Әйтеке би, Мәртөк, Мұғалжар аудандық әкімдіктері бар. Мәселен Ырғыз аудандық әкімдігінің басшылары табиғи қорық аймағын өрттен сақтап қалған. Әйтеке би аудандық әкімдігі өртке қарсы шараларға 26 млн. теңгеден көп қаржы жұмсаған. Ал Мәртөктегі Жайсаң ауылында құрылған өрт сөндіру бекетінің қызметкерлері биыл 18 өртті сөндірген. Мұғалжар ауданында ерікті өртке қарсы құрылымдар жақсы дамыған. Қазір олардың құрамында 540 адам бар. 200-ге жуығы арнайы киіммен қамтамасыз етілген.