Қазір қай бағытқа болсын пойызға билет табу қиын. Керісінше, делдалдардың жұмысы қызып тұр. Олар кез-келген бағытқа екі есе қымбат билеттерді саудалап жүр. Арнайы рейд өткізген жемқорлықпен күресуші орган өкілдері осындай бірқатар былықтың бетін ашты. Пойыз жолсеріктері билет тапшы кезде жолаушыларды жүк қоятын үшінші сөреге, өздері жататын орынға немесе тамбурға да отырғызуға дайын.
Аталмыш ведомоство Ақтөбе-Атырау, Ақтөбе-Астана мен Ақтөбе-Алматы бағыттары бойынша қатынайтын жолаушылар пойызын тексерген. Рейд барысында алыпсатарлар да анықталды. Сондай-ақ, жолаушыларды билетсіз мінгізген жолсеріктер де бар. Жолсерік пен делдал арасында байланыс бар. Жиналғандар көліктегі полиция қызметкерлері алыпсатарлардың әрқайсысын жатқа білуі мүмкін,-деген ой айтты. Ақтөбе стансасындағы ішкі істер желілік бөлімі бастығының орынбасары Нұржан Өсербаев өз қызметкерлеріне шаң жуытпаса да, тексеру жүргізетінін жеткізді. "Қазақстан темір жолы " АҚ өкілдерінің өз уәждәрі бар. Олар пойыз жетіспеушілігін алға тартады. Жаз жұрттың жаппай демалысқа шығатын мезгілі болғандықтан, жолаушылардың саны көбейтіні рас. Ал Ақтөбе вокзалында сабылғандардың дені-билет таппай жүрген тұрғындар. Олар діттеген жеріне жету үшін жолсеріктермен келісуге тырысады. Еңбек демалысы қызған маусымда вокзал кассаларында жыл сайын билет тапшылығы туындайды. Бұл-қалыпты жағдай. Амалы таусылған жолаушылар жол жүру билетін екі есе қымбат болса да алырсатарлардан сатып алуға мәжбүр. Рейд кезінде, билетсіз жүрудің орташа бағасы 5000 теңге мен 20 мыңның аралығында екені анықталды.