Бестамақтағы шошқа фермасының қызметін толық тоқтата тұру туралы сот шешімі шыққанына қарамастан кешен әлі жұмыс жасап жатыр. Онымен қоймай, айналаны сұйық қалдықтармен ластауын тияр емес. Тұрғындар өтінішімен фермада кезекті тексеру жүргізіліп, бұл заңбұзушылық расталды. Кәсіпорынға 291 мың 700 теңге көлемінде айыппұл салынды және 500 мың теңге көлемінде қоршаған ортаға келтірілген залалды өтейді. Облыстық экология департаменті биыл 14-мамырда "Парижская коммуна" ЖШС-нің қызметін толықтай тоқтата тұру туралы сотқа жүгінген. 22-ші шілдеде ол талап-арыз қанағаттандырылды. Бірақ компания сот шешіміне қарамастан жұмысын тоқтатпағанға ұқсайды. Өйткені Бестамақ ауылының тұрғындарынан шошқа фермасынан сарқынды суды далаға ағызу әлі тиылмай тұр деген шағым қайта түскен. Облыстық экология департаменті кезекті арызынан кейін кешенде қайта тексеру жүргізді. Заңбұзушылықтар расталған.Қанша ескерту алса да компания басшылығы одан еш нәтиже шығармай отыр. Экология департаменті мәселені қатаң бақылауда ұстауда. Еске салсақ, "Парижская коммуна" ЖШС-не тиесілі Бестамақ ауылындағы мал шаруашылығы кешенінде мал ұстау, бордақылау, оларды етке сою жұмыстары ұзақ жылдар бойы санитарлық талаптарды өрескел бұза отырып атқарылып келген. Нәтижесінде қоршаған ортаға орасан зор залал келді. Компания басшысы сот шешімімен мемлекетке 7 миллиард теңгеден аса қаржы өндіруге міндеттелді. Кәсіпкер келтірілген залалды өтеуден жалтарып, қазір бұл қаражатты мәжбүрлі түрде өндіру үшін іс әділет департаментіне жолданған.