Салтанатты митинг бүгін "Бауырластар зиратында" да өтті. Мұнда жерленген 300-ге жуық жауынгердің рухына тағзым ету үшін сүт зауыты ауданы мен қаланың ескі бөлігінің тұрғындары жиналды. Зират басында тыл еңбеккерлері сөз сөйлеп, мектеп оқушылары Жеңісті дәріптеп, тақпақтарын айтты. Соғыс әндері шырқалды. Ақтөбеліктер ҰОС-на қатысқан ата-бабаларын еске алды. Ал бұл зиратта 300-ге жуық кеңес жауынгері жатыр. Соғыс жылдары жараланып, Ақтөбедегі госпитальдарда көз жұмғандар. Гранитті плиталарда олардың есімдері жазулы. Бұл мемориал 2010-шы жылы Жеңістің 65 жылдығына орай қайта жарақтандырудан өткен еді. Алайда бірнеше рет бұзақылар қиратып кетті. Мереке қарсаңында қайтадан қалпына келтірілген. Зират басында салтанатты митингті өткізуге №5-ші орта мектеп мұрындық болды. Көк туымыз ортаға шығарылған соң, бейбіт еліміздің әнұраны асқақтады. Одан кейін ҰОС-да Жеңіс үшін жан берген жауынгерлерді жиылғандар 1 минут үнсіздікпен еске алды. Мектеп оқушылары дайындаған бағдарлама қала тұрғындарының назарына ұсынылды. Соғыс жылдарындағы әндер шырқалып, №5-ші мектеп оқушылары батырларды дәріптеп, өлең оқыды. Жиынға сондай-ақ, №29, 13, 15-ші мектептердің ұстаз-оқушылары және № 406 зауыт ұжымы қатысты. Әр мекеме зиратқа гүл шоқтарын қойды.