Өңірде биыл 35 елдімекенді су басу қаупі бар деп жуырда төтенше жағдайларға жауапты мамандар хабарлаған еді. Жергілікті атқарушы органдар осы жерлерге қажетті құралдар мен күштерді дайындап отырғанын да айтты. Дегенмен, халықтың көңілінде күмән бар. Көктем жақындаған сайын қорқыныш басым. Екі жыл бұрын болған су тасқыны кезінде аймақтағы Елек, Қарғалы, Жіңішке өзендері арнасынан асып, екі мыңға жуық тұрғын қауіпсіз аймаққа көшіріліп, 300-ден көп үйді су басып қалған еді. 2017 жылдың сәуірінде қызыл судан қала іргесіндегі Кірпішті, Келешек, Махамбет, Қарғалы, Заречный-2 елді мекендерінің тұрғындары көп зардап шекті. Кірпішті ауылының "Эко" бау-бақша ұжымындағылар түнгі сағат үште су келіп, үйлерінен құжаттарын ғана алып шыққандарын айтады. Сол күндер әлі қорқынышты түс секілді дейді. Дегенмен, биыл атқарылып жатқан жұмыстар нәтижелі болады деп үмітті. Түн жарымында көршілерімен бірге қауіпсіз жерге көшірілгендердің бірі - Меруерт Сәрсенғалиева. Резеңке қайықпен керек-жарақтарын тасып шығарған. Әлі күнге дейін көктем жақындаған сайын үрейі ұшады. Кірпішті ауылының осы бау-бақша ұжымының тұрғындарына жергілікті билік өкілдері жеке тұрғын үй құрылысына рұқсат беріледі деп уәде еткен. Алайда, екі көктем өтсе де әлі уәде орындалмапты. Миллиондаған теңгеге шығынданып, өз қаражаттарымен үйлерін қайта жөндеп алған. Жеке тұрғын үй құрылысы есебінде болмағандықтан биліктен қолдау көрмеген. Облыстағы қазір су тасу қаупі бар 8 өзеннің табаны тазартылып, кеңейтіліп жатыр. Ол үшін бюджеттен 6 млрд теңге бөлінген. Биыл 4 мердігер мекеме жұмысқа кіріскен. Ал, қыс басталғалы қала аумағынан 165 мың текше метр қар шығарылды. Жұмыс наурыз айының ортасына дейін жалғасады.