Батыс-2 ауданындағы Тәуелсіздік даңғылы 13 "Д" мекенжайының тұрғындары үйлерінен шыға алмай отыр. Ата-аналар су құбырын өткізу үшін қазылған шұңқырларға түсіп кетеді деп қорыққаннан балаларын да сабаққа жібермей отыр. Ол шұңқырлар қалалық тұрғын үй-коммуналдық шаруашылық бөлімі тапсырысымен өткен айда қазылған. Жаңбыр суына толған шұңқырлар жаяуларға да, көлік жүргізушілеріне де қауіп төндіріп тұр. Нәбия Апиева бүгін немересі мектепке бармағанын айтады. Себебі такси бұл жаққа келуден бас тартқан. Су өткізу үшін қазылған шұңқырлар арасында бір көлік әрең сиятын орын қалдырылған. Ол да ми батпақ болып жатыр. Тұрғындардың сөзінше, өткен айда қалалық тұрғын үй-коммуналдық шаруашылығы, жолаушылар көлігі және автомобиль жолдары бөлімі тапсырысымен жұмысшылар су өткізетін шұңқыр қазамыз деп, жолды қиратып кеткен. Ой-шұңқырды құрғатамыз деп 3 рет су сору техникасы келген. Бірақ нәтиже болмай тұр. Жолдың қашан қалпына келетіні әзірге белгісіз. Қалалық тұрғын үй-коммуналдық шаруашылық бөліміндегілер қазылған жердің екі жағынан көлік өтетін қалдырылғанын жеткізді.Ал жаяу жүргіншілерге үй арасымен қатынауға кеңес берілді. Алдағы уақытта жағдайды реттеу үшін қандай жұмыстар жүгізілетіні белгісіз.