Қаланың элиталық ауданы саналатын "Батыс-2"-де тұрғындар екі айдан бері ыстық сусыз отыр. Төрт бірдей көпқабатты үйдің тұрғындары жағдайымызды айтып, "бармаған жеріміз, баспаған тауымыз" қалмады деп шағымданды. "Қазақстан ипотекалық компаниясының" желісімен пәтерлерді кейін сатып алу құқымен жалға алған тұрғындар мәселенің шешілмей отырғанына алаңдаулы. "Батыс-2" ауданы 8 "Г" мекен жайында орналасқан мына төрт көпқабатты үйдің тұрғындары шілденің 8-нен бері ыстық сусыз отыр. Айтуларынша үйлерге ортақ екі қазандық істен шыққан. Бір рет тұрғындар 700 мың теңге жинап, өз қаражаттарына қазандықтардың бірін жөндеткен. Алайда көп ұзамай қайта бұзылып қалған. Ал, қазандықты күтіп ұстауға міндетті басқарушы компания мүлдем қарамаған. Керісінше, басшысы бірнеше рет ауысып, тұрғындардың жинаған ақшасы зая кеткен.Тұрғындар бұл үйдегі пәтерлерін "Қазақстан ипотекалық компаниясы" арқылы сатып алу құқығымен жалға алған. Биыл 4-ші жыл қыстағалы отырған пәтер иелері жылу маусымы басталғанға дейін мәселеміз шешілсе екен дейді. Екі ай ыстық сусыз отырғаны аздай, екі күннен бері бұл үйлерде газ да жоқ. Ара тұра жарық сөніп, бітпейтін проблемалар тұрғындарды әбден мезі қылған. Бірінен соң бірі туындаған қиындықтарын айтып, тұрғындар әкімдікке де шағымданған. Қала әкімінің орынбасары Сергей Ли бастап келген қалалық тұрғын үй - коммуналдық шаруашылығы бөлімінің өкілдері, тұрғын үй инспекциясы бөлімінің мамандары, "Қазақстан ипотекалық компаниясының" қызметкерлері осыдан бір ай бұрын тұрғындардың арыз-шағымын тыңдап кеткен. Арнайы комиссия құрып, құжаттарды тексереміз, жауапты тұлғаларды анықтаймыз деген олар әлі күнге дейін хабарсыз, дейді тұрғындар. "Батыс-2" ауданы 8 "Г" мекен жайындағы төрт үйдің мәселесін қозғап, жауапты органдарға біз де хабарластық. Алайда, мардымды жауап ала алмадық.