Бүгін Ақтөбеде өртке оранған пәтерден мүгедек қария мен екі баланы құтқарған азамат марапатталды. Салтанатты шараға әскери қызметкердің отбасы да қатысты. Батыр жігіттің батыл қадамын облыстық төтенше жағдайлар департаменті елеусіз қалдырмады. Рысқали Еңсепбаев қаладағы №6655 әскери бөлімнің ефрейторы. 16-сәуір күні кешкі 7-лер шамасында кезекшіліктен шығып, үйіне қайтып бара жатқан ол Махамбет көшесінде орналасқан тұрғын үйлердің бірінен қалың түтінді байқайды. Жалын екі қабатты тұрғын үйдің 1-қабатынан шыққан. "Құтқарыңдар" деген дауысты ести сала оқиға орнына жүгірген. Өрт сөндіру қызметі жеткенге дейін 73 жастағы мүгедек ер адамды, 70 жастағы әжей мен 2 және 4 жастағы бүлдіршіндерді терезеден сыртқа алып шығады. "Адам өмірінен асқан байлық жоқ"-деген Рысқали бұл ісін ерлікке баламайды. Жай ғана парызымды орындадым,-деп есептейді. Өзінің әрекеті жас сарбаздарға үлгі болады деген сенімде. Бүгінгі салтанатты шараға Пысқали Еңсепбаевтың анасы мен жұбайы, екі баласы да келді. Рысқали Еңсепов Қызылорда облысы, Арал ауданына қарасты Сазды ауылында туған. Келісімшарт бойынша Ақтөбеде қызмет етіп жақанына биыл 4-жыл. Қаладағы №6655 әскери бөлімде қазір 400-ге жуық жас сарбаз Отан алдындағы борышын өтеп жүр. Еліміздің түкпір-түкпірінен келген олардың ең жасы 18-де.