Басшылығынан жалақы көтеруді талап еткені үшін қаладағы құрылыс маркеттерінің бірінің 52 жұмысшысы жұмыстан қуыла жаздады. Бүгін таңда күзет қызметкерлері оларды ішке алмай қойған. Жұмыс орындарына жіберілмеген топ еңбек инспекциясына ауызша арыз түсіргеннен кейін барып қана жағдай реттелді. Бүгін ертемен айналасында үлкен шу болған мына нысанның алды түс ауа тып-тыныш. Құрылыс маркеті жұмысшылары наразылыққа шыққан болатын. Жұмыс орындарына кіре алмаған 52 жұмысшы кеше басшылықтан еңбекақыларын 20 мың теңгеге көтеруді сұраған. Бірақ тілектері орындалмай, басшылығы керісінше олардан жұмыс орындарын босатуды сұрапты. Жабық болған қақпадан ішке кіре алмаған жұмысшылар облыстық еңбек инспекциясына арызданады. Ұжымнан түскен ауызша арызға байланысты еңбек инспекторлары дереу тексеру жүргізген. Бірақ жеке кәсіпкерлік басшысы екі күн бойы 52 қызметкердің жұмыс орнында болмағанынан хабарсыз болғандығын айтқан. Мұндай әрекетке күзет қызметкерлері барған болу керек деп қысқа қайырыпты. Не себепті жұмысшылардың жұмыс орындарына жіберілмегені әзірге жұмбақ. Облыстық еңбек инспекциясы түсініксіз жағдайға тап болған жұмысшылардан жазбаша түрде арыз түсетін болса ғана жеке кәсіпкерлікке толыққанды тексеру жүргізе алады. Ал бұл уақытқа дейін "Бектұрова" жеке кәсіпкерлігіне қатысты облыстық еңбек инспекциясына бірде-бір рет наразылық хаты түспеген.