Терроризмнен аулақ жүріңдер! Елдің бас прокуроры Жақып Асанов ақтөбелік оқушылармен кездесуі кезінде лаңкестік, экстремизм және отбасы құндылықтары туралы әңгімелесті. Жеткіншектерді жаман әдетке ұрынбауға, теріс идеологияның құрбаны болмауға шақырды. Терроризм, экстремизм деген ұғымдар ақтөбеліктерге жақсы таныс. Бас прокурор оқушыларға олардың мәнін түсіндіріп жатпады. Бірден бойларыңды лаңкестіктен аулақ ұстаңдар деп қайталап айтты. Прокурор бұл қауіппен бүкіл әлем күресіп жатқанын, лаңкестікті тамырымен құртатын күн туатынын айтты. Жақып Асанов оқушыларды еңбекқорлыққа шақырды. Бір саланың маманы, нағыз шебері болуға  кеңес берді. "Армандардың бәрін қағазға түсіріп, мақсатқа айналдырып, оған күн сайын ұмтылыңдар" деді. Облыс әкімі Бердібек Сапарбаев балаларға уақытты бос өткізбей, мүмкіндік барда өнер, білім, ғылым, спортпен айналысу керектігін еске салды. Ол үшін біздің қалада барлық жағдай жасалады. Қазір жаңадан оқушылар сарайы, мұз айдыны, жастар орталығы салынып жатыр. Ақтөбеде  кешеден бері елбасы жіберген арнайы жұмыс тобы жүр. Мамандар бір ай бойы мектептер, оқу орындары, түзету мекемелері мен мешіттерде халықпен кездесулер өткізеді.