Әлия Молдағұлова даңғылындағы №64-мектеп оқушыларының сабаққа қатынауы қиындады. Мектеп маңындағы элиталы үйлер айналасын қоршап, автотұрақ салып алып, балалардың аяқ жолын бөгеп қойған. Енді жолдың арғы бетіндегі мектепке бару үшін оқушылар көше-көше кезуге мәжбүр. Ата-аналар балаларының қауіпсіздігі үшін алаңдаулы. № 64- ші орта мектеп Әлия Молдағұлова даңғылында орналасқан бірнеше көп қабатты тұрғын үйге қарсы бетте тұр. Алайда, жолдың арғы бетіндегі мектепке жету ата-ана мен бала үшін мұң. Араға қос элиталық үй салынған. Үйлердің маңайы қоршалып, аула жанына автотұрақ салынған. Балалар сол автотұрақ арқылы өтіп жүрген. Биыл оның да есігін бітеп тастаған. Енді қол созым жердегі мектепке жету үшін балалар "ел айналады". Бұған ата-аналар наразы. Бұл-Әлия Молдағұлова даңғылының бойында орналасқан №20 мен №17-ші үйлерге ортақ автотұрақ. Ата-аналар қоршауды бұзбай, тек есігін ғана ашуды сұрап отыр. Құлып салса, кілтін сатып алуға да дайынбыз, дейді.Мәселемен қалалық сәулет және қала құрылысы бөлімі таныс. Әлия Молдағұлова даңғылында орналасқан көп қабатты үй тұрғындары мамыр айында арыз жазған. Алайда құзырлы мекеме, бұл жеке сектор, өз аумағын қоршауға да, өзгелердің өтуіне бөгет қоюға да құқылы деп жауап берген. Бұл мекенжай бойынша орнатылған қоршау заңды ма, белгісіз. Мұны келесі аптада ведомоство қайта тексермек.
Ата-аналар балаларының қауіпсіздігі үшін қоршауды ашуды сұрап отыр. Алдымыз қыс, балалардың амандығы керек, дейді тұрғындар.