"Жақсы кітап-жан азығы". Бүгін Мақсұт Құсайынов атындағы облыстық дарынды балаларға арналған мамандандырылған мектеп-интернатында кітап алмасу акциясы өтті. Мектеп 200-ден астам кітап шығарды. Таңдау мол. Талап біреу ғана-ол кітап оқу. Балалар қалаған әдебиетін алып, орнына өздері әкелген кітаптарын ұсынады. Буккроссинг акциясына кітапты жанына серік ететін балалар түгелдей қатысты. Олар өздері оқыған кітабын ортаға қойып, басқа оқырманның оқуына мүмкіндік бермек. "Оқып болсаң, досыңа бер" қағидасын ұстанған оқушылар үйлерінен көркем әдебиет, тарихи кітаптармен қоса ғылыми-танымдық оқулықтарын да алып келген. Оқушылар үшін кітап алмасу акциясы мереке. Өтйкені бұрын-соңды оқымаған әдебиеттерін сатып алмай-ақ, осы жерден тауып жатыр. Балалардың айтуынша, кітап оқу арқылы адамның қиялдау мүмкіндігі артады. Балалар үйден әкелген кітаптарының орнына Ілияс Есенберлин, Мұхтар Мағауин, Әбіш Кекілбаев, Зейнеп Ахметованың шығармаларын алды. Дәстүрлі шараның мақсаты-оқушыларды әдеби кітап оқуға баулу, жазғы каникул кезінде бос уақыттарын тиімді өткізуге жол көрсету.