Пайдаланылған сақтандыру құралы бақша балаларының ойыншығына айналды. Балабақша ішінде ләззатқа бөленгендер, арттарына айғақ заттар қалдырып кеткен. Ал пайдаланылған мүшеқапты ертесіне бақшаға келген балалар тауып алып, ойыншық қылған. Тұңғыш президент күніндегі үш күн демалыста балабақшаны кезектесіп 3 күзетші қарауылдаған. Екеуі егде жастағы ер адамдар. Бірінің зейнетке шығуына 4 ай қалған. Бірі екі жылдан кейін зейнеткерлікке шығады. Ал үшінші күзетші 25 жастағы жігіт. Бақша қызметкерлерінің бірінің айтуынша жас жігіт кезекшілігінде қасына досын ертіп келген. Арасында камераны 10 минуттан екі рет сөндіріп, үшінші бір адамды кіргізген. Бұл жағдайдың бәрі қалалық білім бөлімі басшысының құлағына өткен сенбіде ғана жеткен. Балабақшада қызметтік тексеру басталды. Ол әлі жүріп жатыр. Бүгінге дейін бақша меңгерушісі, күзетшілер және ата-аналардан жауап алынған. Бірақ, ешқайсысынан да жазбаша түрде арыз-шағым түспеген. Қызметтік тексеру аяқталып, мәселе шешілгенше №41-ші "Назерке" балабақшасының меңгерушісі қызметінен уақытша шеттетілді. Ал күзетшінің бірі үшін бақшадағы жұмысы қосымша табыс көзі болғандықтан, жұмыстан өз еркімен кетуі мүмкін, дейді Индира Бексұлтанова. Өкінішке орай, бақшадағы былық туралы шағым айтып, редакциямызға қоңырау шалған ата-аналардың бұл оқиғаға қатысты пікірін білу мүмкін болмады. Өйткені жауап беруден бас тартты.