Бүгін шаһарда қайырымдылық мәдениетін дамытуға және мүгедектігі бар адамдардың жағымды бейнесін қалыптастыруға бағытталған "Біз біргеміз" атты дәстүрлі әлеуметтік-маңызды акция өтті. Дәстүрлі акцияда өз белсенділігімен жетістікке жетіп, айналасына үлгі көрсетіп жүрген мүмкіндігі шектеулі азаматтарға сый-құрмет көрсетілді. Ақтөбеде қимыл-тірек қозғалысында ақауы бар азаматтардың белсенділігін арттыру мақсатында былтыр "Тең қоғам" ұйымы ашылған болатын. Ұйымның бүгінгі таңда мүшелері саны артқан. Шаһарда белсенді, ерен еңбегімен көпшілікке үлгі көрсетіп жүрген мүгедек жандар аз емес. Олардың ісін, қалың бұқара арасында насихаттау қалалық сал ауруына шалдыққан азаматтарды қолдау орталығының жетекшісі Құралай Бәйменованың бастамасымен қолға алынған. Бұл ретте "Біз біргеміз" атты әлеуметтік - маңызды акцияның орны ерекше. 2000- жылы бастау алған акцияға бүгінгі күнге дейін үш мыңнан астам бала мен ересектер қатысқан.Тағдыр тәлкегіне түскен жарымжан жандардың тағдыры атқарушы биліктің әрдайым назарында. Мүмкіндігі шектеулі жандарға әр жылдары үй беріліп келеді. Былтыр баспана алу кезегі келген 5 мүгедек пәтермен қамтылды. Инватакси қызметін көрсететін қосымша бір көлік берілген. Шара барысында, өмірдің қиындығына мойымай, көпшілікке үлгі көрсетіп келе жатқан 20 отбасының берік дәстүрі, өнегесі дәріптелді. Оларға ақтөбелік демеушінің атынан сый-құрмет көрсетілді. Ал, мүмкіндігі шектеулі жандарға арналған сән үлгілерін көрсету жиналғандардың көңілін аударды. "Біз біргеміз" атты әлеуметтік-маңызды акция аясында биыл белсенді азаматтардың қатары көбейеді деген үміт бар. Себебі, ұйымдастырушылардың айтуынша, қолынан іс келгенімен, жұмыс таппай отырған мүгедек жандарға қолдау көрсетілмек.