Елек полиция бөлімінің бұрынғы қызметкерлері жұмыссыз жүр. Аталған бөлімнің бес басшысы мен төрт тергеушісі былтыр көктемде қызметтерінен қуылған. Олар бүгін тілшілерді жинап, Бас прокурордан араша сұрады. Елек полиция бөлімінің бастығы Ербол Исмурзин, тергеу бөлімінің басшысы Манас Сүйесов пен тағы 7 қызметкер 2016-жылдың сәуір айында облыстық ішкі істер департаментінің сол кездегі басшысы Мақсұдхан Әбләзімовтың бұйрығымен бір күнде жұмыстан босатылған. Тергеу бөлімшесінің енді бұрынғы басшысы Манас Сүйесов те, оның әріптестері де бұл шешіммен келіспейді. Манастың айтуынша, бұлардан кейін Сазды, Зауыт пен Заречный полиция бөлімдерінде де қызметтік тексеру жүргізіліп, осындай ескерту жасалған. Бірақ, ешкім жұмыстан қуылмаған. Бұл жайтты облыстық ішкі істер департаментіндегілер былай түсіндірді. Полиция қызметкерлері бір жыл бойы бірнеше сотқа шағым түсіріп, екі апта бұрын соңғы шешім шығарылған. Сот оларды жұмысқа қайта орналасу мүмкіндігінен біржола айырған. Балалары жұмыстан заңсыз кетті деп ата-аналары Ішкі істер министрлігіне де арыз жазған. Бірақ, бәрі "жұмыстан заңды шығарылды" деп отыр. Амалы таусылған экс-полицейлер енді Бас прокуратурадан араша сұрамақ. Айта кетер жайт, Елек полиция бөлімінің 9 қызметкері жұмыстан шығарылған кезде оларға қатысты Қылмыстық кодекстің "Қызметтегі әрекетсіздік" бабы бойынша іс қозғалған. Алайда кейін олардың әрекеттерінде қылмыстық құрам болмағандықтан, іс қысқартылды.