Той-думан "Бірлік пен келісім" сулы-жасыл гүлзарында жалғасты. Сулы-жасыл гүлзарда Наурыз мейрамы биыл алғаш рет тойланды. Халық санында есеп жоқ. Қазақстан халқы ассамблеясы үйі "Қоғамдық келісім" мекемесімен бірге ашық аспан астында ұлттық бұйымдар көрмесін ұйымдастырған. Қолөнер шеберлері жасаған дүниелер мерекеге сән қосты. Ал, сахнада қаламызда кеше өткен 2-вокалды-хореографиялық фестивальдің жеңімпаздары мен дипломанттары марапатталды. Ән мен би байқауына көршілес Орынбор облысынан өнер ұжымдары да қатысқан болатын. Өнерпаздар бүгін гүлзарда концерт қойды. Сол жерде бірнеше шатыр тігіліп, қазан көтеріліп, бауырсақ пісірілді. Аспаздар ұлттық дәмді дайындап үлгермей жатыр. Жұрт ыстық бауырсақты таласып жеді. Наурыз-көже, палау да таратылды. Әзербайжан диспорасы Наурызға өз көжелерін, ұлттық тағамдарын дайындаған. Бауырлас халық өкілі Тагир Асадов қазақ жұртына тыныштық, бірлік тіледі. Сулы-жасыл гүлзарда балалар алтыбақан теуіп, арқан тартысты. "Нұр ғасыр" мешітінің алдында спорттық жарыстар өтті.