Кеше кешкілік Әбілқайыр хан даңғылындағы №67-үйде бірнеше пәтердің балконы өртенді. Тілсіз жау 4 пен 9-шы қабат аралығында 50 шаршы метр аумақты шарпыған. Оқиға орнына дереу жеткен құтқарушылар көп қабатты үйден 60 адамды эвакуациялап, 10 адамды құтқарды. Абырой болғанда ешкім зардап шеккен жоқ. Шаһардың басты даңғылындағы №67-ші үйде болған өрт туралы хабарлама төтенше жағдай қызметінің 101 нөміріне кеше сағат 16:48-де түскен. 9-қабатты үйдің 3 балконы жанып жатырғандығын естіген құтқарушылар бірден оқиға орнына жетті. Өрт сөндірушілер жеткенше тілсіз жау 4-қабаттан 9-қабатқа дейін жайылған. Алдын ала болжам бойынша қызыл жалын балкондардың сыртқы қаптамасы арқылы тез тарап кеткен. 50 шаршы метр аумақтағы өртті мамандар 20 минутта толығымен сөндірді. Атап өтейік, өрт болған көп қабатты үйдің қасбеті тез жанғыш жапсырмалармен безендірілген. Ақтөбеліктер адам өміріне қауіп төндіретін мұндай материалдарды сәндік үшін ілудің қажеті жоқ дейді. Еске салайық, осыдан 3 жыл бұрын дәл осындай жапсырмалармен қапталған Әбілқайыр хан даңғылындағы №73-үйде екі қайтара өрт оқиғасы тіркелген еді. Ол кезде де қылтимада тұтанған өрт 30 шақты пәтерді зақымдаған болатын. Абырой болғанда адамдар аман қалды. Темекі шоғы сәнді жапсырмаға тиіп жалын лезде тұтанғанын растаған облыстық төтенше жағдайлар департаментінің өкілдері бұл мәселені шешеміз деп сол кезде уәде еткен. Алайда, уәде уәде күйінде қалды. Ал қалада осындай сәндік қаптамамен 13 көп қатарлы үйдің қасбеті безендірілген.