Ақтөбеде даңқты қолбасшы Бөкенбай Қарабатырұлының мемориалды кешені ашылды. Кешен әуежай аумағында, батыр атындағы даңғылдың бойында орналасқан. Мемориалды кешеннің салтанатты ашылу рәсімі Бөкенбай Қарабатырұлының өмірі жайлы театрландырылған қойылымнан басталды. Батыр жастайынан өзінің ағаларымен бірге жоңғар шапқыншылығына қарсы күреске шығып, ерлігімен көзге түсті. 18 ғасырдың бас кезінде Табын руына рубасы болып сайланды. 1710 жылы Қарақұмдағы халық құрылтайына қатысып, онда жауға тегеурінді соққы беру үшін бытыраңқы қазақ жасақтарын біріктіру жөнінде ұсыныс білдірді. Жоңғарлармен күресте Әбілқайыр ханмен бірге болып, қазақ жасақтарының үлкен бір тобына қолбасшылық жасады. 1726 жылы Әбілқайырдың Еділ қалмақтарына жасаған жорығына қатысты. Бөкенбай батырдың ұрпақтары бабаларының есімін ұлықтап, оның мүсінін орнатуға он жыл бұрын кіріскен. Тек соңғы екі жылда жұмыс қарқын алып, зәулім кешен бой көтерді. Әбілқайыр ханның бас қолбасшысы болған батырдың ескерткішін ашу рәсіміне зиялы қауым өкілдері, ел ағалары көп жиналды. Олар Бөкенбай Қарабатырұлының ерлік жолын дәріптеп, тұтас бір кешен ашудың маңызын түсіндірді. Еңселі ескерткіштің арқа тұсында Әбілқайыр хан мен Бөкенбай батыр бастаған үш жүздің әскері бейнеленген. Батырдың қолында Қарақұмдағы құрылтайдан кейін құрылған қазақ әскерінің туы бар. Мемориалды кешен 150 млн теңгеге тұрғызылды. Қаражатты жан-жақта тұратын батырдың ұрпақтары, кәсіпкерлер жинаған. Ескерткіштің авторы - Жеңіс Жұбанқосов. Ол Әйтеке би мен Әлия ескерткіштерін сомдаған белгілі мүсінші. Кешен екі жарым мың шаршы метр аумақты алып жатыр. Ескерткіштің биіктігі алты метр, тұғырының биіктігі де алты метр.