Сыңғырла соңғы қоңырау! Бүгін облыс мектептерінде жас түлектер үшін соңғы қоңырау соғылды. Мектеп бітіру кештері санитарлық талаптар шеңберінде өтті. Мәселен, №51-мектеп-гимназияның түлектері ара қашықтықты сақтай отыра сапқа тұрған. Жас түлек лентасын таққан ұл-қыз білім ордасымен қоштасатынына сенбей тұрған секілді. Шәкірттерімен бірге ұстаздары да толқып жүр. №51-мектеп-гимназияны 129 түлек бітіріп жатыр. Олардың 14-і "Алтын белгіден" үміткер. Тағы 14 түлек "Үздік аттестаттан" үмітті. Ал соңғы қоңырау салтанатына жиналғандар мектеп бітіруші түлектерге сәт сапар тіледі. Үлкен өмірге қанат қаққан оқушыларын ұстаздары қимай жатты. Биыл мектепті облыс бойынша 7483 түлек бітіріп жатыр. Оның 668-і озат оқушы, яғни "Алтын белгіден" үмітті. Тең жартысы екпінді оқушылар. Балалардың жалпы білім деңгейі 74 пайызды құрады. Сәуір айынан бері өтіп жатқан ҰБТ-леудегі орташа нәтиже осындай. Пандемия осымен екінші жыл қатарынан мектептердегі соңғы қоңырау рәсіміне өзгеріс енгізді. Білім және ғылым минстрлігінің шешімімен биыл да соңғы қоңырау тек қана 9,11 сынып оқушылары үшін дәстүрлі форматта өтті. Қалған оқушылар бұл салтанатты үйлерінде онлайн тамашалады. 26 мамыр- 19 маусым аралығында ел бойынша оқушылар жазғы мектептерде алдын ала жазылып, сабақ оқи алады.