Бүгіннен бастап, елімізде міндетті медициналық сақтандыру туралы Заң күшіне енді. Облыс тұрғындарының 99 пайызы өзінің әлеуметтік мәртебесін анықтады. Облыстық денсаулық сақтау басқармасы мамандарының айтуынша, бұл науқан қазан-қараша айларында да жалғаспақ. Бүгіннен бастап, жұмыс беруші әр қызметкерінің еңбекақысының 1 пайыздық мөлшерін медициналық сақтандыру шотына аударауы тиіс. Бұл 1 процент сіздің еңбекақыңыздан бөлінбейді. Бұл ақшаны жұмыс беруші заң бойынша аударуы тиіс. Медициналық сақтандыру шотын аша алмайтын тұрғындар да бар. Олар-мүгедектер, зейнеткерлер, балалар, студенттер, бала күтімімен үйде отырған әйелдер. Оларға мемлекет есебінен шот ашылады. Мұндай жеңілдік көп балалы аналарға да қарастырылған. Ал келер жылдан бастап шотқа түсетін сома айлықтың 1,5 пайызын құрайды. 2020 жылы 2 пайызға жетеді. Егер сіз жұмыссыз болсаңыз, онда жергілікті жұмыспен қамту орталығына жұмыссыз ретінде тіркелуіңіз керек. Мамандардың айтуынша, облыс тұрғындарының 99 пайызының мәртебесі белгілі. Тек пәтерден-пәтерге көшіп, еш емханада тіркелмеген азаматтарға ғана медициналық көмек алу қиынға соғады. Мұндай жағдайда, тез арада өзіңіз тұрып жатқан мекен-жай бойынша орналасқан емханаға барып, тіркеліңіз. Медициналық сақтандырудың екі түрі бар, алғашқысы-міндетті болса, екіншісі-ерікті сақтандыру. Мәселен, сіз тұрғылықты мекен-жайыңыз бойынша емес, қалаған емханаңызға барып тіркеле аласыз. Ақтөбеліктердің арасында "Дару" оңалту орталығы, "Әйгерім" мен "Қуаныш" клиникаларына барып тіркелгендері де бар. Міндетті әлеуметтік медициналық сақтандыру пакетіне түрлі операциялар жасау да кіргізіледі.