Бүгін Чернобыль құрбандарына арналған ескерткіш жанында митинг өтті. Биыл Украина елінде болған техногендік алапат апатқа 36 жыл. Ақтөбелік "чернобыльдықтар" бүгінге жетпеген тағдырластарын еске алып, оларды бір минут үнсіздікпен еске алды. Естеліктер айтып, ескерткішке гүл шоқтарын қойды.
"Чернобыль құрбандары" қоғамдық бірлестігінің мүшесі Темірхан Мұқаштың айтуынша, бүгінде өңірде Чернобыль атом электр стансасындағы апатты жоюға қатысқан 2000 адамның 200-і ғана қалған. Олардың көбі мүгедек. Ал бүгінгі жиынға Чернобыль құрбандары қоғамдық бірлестігінің мүшелері, апаттың зардаптарын жоюға қатысқандардың жесірлері мен туыстары, ардагерлер мен жастар қатысты. Айта кетейік, облыстық мәслихаттың шешімімен 2007-жылдан бері ақтөбелік "чернобыльдықтар" барлық коммуналдық төлемдерден босатылған. Олар қоғамдық көлікте тегін жүреді және жыл сайын республиалық медициналық орталықтарда емделуге құқылы.