Қыркүйек айында өңірімізде инфляция деңгейі 0,3 пайызға жеткен. Бүгін облыстық статистика департаментінің мамандары өткен айды қорытындылады. Дүкен сөрелеріндегі азық-түлік бірнеше пайызға қымбаттаған. Әсіресе, жұрт күнде тұтынып отырған өнімдер. Маусымға қарамастан, қыркүйек айында қиярдың бағасы 17,4 пайызға өссе, жеміс-жидектің бағасы 2,3 пайызға көтерілген. Сиыр етінің бағасы да ұшып тұр. Шұжық пен ет өнімдері 2,3 пайызға қымбаттаған. Мамандардың айтуынша, бұл да маусымдық құбылыс. Баға малдың жем-шөбінің қымбаттауына байланысты өзгеріп жатыр. Бензиннің бағасы тек қыркүйек айында ғана 3,2 пайызға өскен. Осыдан бір ай бұрын АИ-92 маркалы жанар-жағар май 143 теңге болса, қазір 150 теңгеден сатылуда. Киім-кешек пен аяқ киім, тұрмыстық заттар, құрылыс материалдары 4 пайызға қымбаттап отыр. Тұрғындардың пікірінше қымбатшылықтың негізгі себебі-энергетика нарығындағы бағаның өзгеруі. Бензиннің қымбаттауы. Ақылы қызмет түрлері де қымбаттады. Мәселен, техниканы жөндеуге 3,4 пайыз, қоғамдық орындарда тамақтану 0,9 пайызға өсті. Теміржол билеттерінің бағасына бір айдың ішінде 3,1 пайыз қосылған. Ұшақпен қатынау 10,3 пайызға қымбаттаған. Ұлттық банк төрағасы Данияр Ақышев қымбатшылыққа зейнетақы мен жәрдемақылардың өскені әсер еткенін айтты. Импортталатын тауарлар құнының көтерілгенін де алға тартты. Ұлттық банк жыл қорытындысы бойынша инфляцияның ресми көрсеткіші белгіленген 6-8 пайыз аралығында болады деп болжайды. 2018 жылы инфляция 5-7 пайызды құрайды деп болжанып отыр.